Warda Costa ta encontra 9 ilegal den un boto local 'La Reina'

* agentenan tambe a descubri y confisca un arma y municion

ORANJESTAD (AAN): Den oranan di merdia durante un control di Warda Costa a detecta un boto local di piscado ta nabega y a tuma decision pa controla e boto cu e nomber 'La Reina'.

Na momento cu Warda Costa a acerca e boto, e agentenan a mira dos persona abordo. Yegando mas banda di e boto e agentenan a nota mas hende riba e boto ta purba sconde drumi riba otro. Aki e team di Warda Costa a aborda e boto pa haci control y a resulta di ta trata di un boto cu 9 persona indocumenta abordo.

E agentenan tambe a descubri y confisca un arma y municion. Tur 9 persona cu nacionalidad Venezolano di cual, tres dama, tres homber y tres mucha a keda entrega na Cuerpo Policial di Aruba y Warda nos Costa pa mas investigacion.