Turista cu su vehiculo a pasa den cruzada sin stop y ocasiona accident

ORANJESTAD (AAN): Un turista kende recien a caba di yega Aruba, tabata moviendo Diadomingo anochi cu su vehiculo di huur den Weststraat ta bayendo nort. 

Ora cu el a caba di pasa dilanti Win Lee Supermarket e ta yega e cruzada cu Prof. Lorentzstraat unda e tin di stop.  Pero kizas e no a mira e borchi of no ta pone tino, y a djis yega subi e cruzada.

   Net e momento ey un Mitsubishi Lancer color shinishi tabata bin riba Prof. Lorentzstraat ta bayendo pabao.  Diripiente e vehiculo di e turista, esta e Hyundai Santa Fe VeraCruz color preto cu number V-2862 a sali su dilanti.  Mucho e no por a haci, pasobra den un instante el a dal den e porta di pasahero di e vehiculo SUV di e turista.

   E momentum di e impacto a pone e Hyundai hala abrupto na man robez, subi acera banda pabao, mishi cu un baranca grandi, y bay finalisa 22 meter mas leu contra e cura di cas Prof. Lorentzstraat 14.  El a djis mishi cu e cura, sinembargo esaki a scheur y bay tiki di banda.

   Central di Polis mesora a dirigi unidad di Polis di Playa rumbo pa e lugar.  Na nan yegada, a bin topa cu e Mitsubishi Lancer cu debi na e impacto a bira 90º y ta awor cara pa Weststraat bay abao.  Riba acera a haya ocupantenan sinta abao.  Polis a nota cu tin en total 3 persona levemente herida.

   Ambulans a yega, y Paramediconan a pasa check cada un di e tres personanan aki, pero na final ningun di nan tabata desea cu bay pa Servicio di Emergencia na Hospital.