President di SPA, Rodney Solognier:
ORANJESTAD (AAN) President di Sindicato di Polis (SPA), señor Rodney Solognier, den entrevista cu DIARIO a declara cu aworaki nan organizacion sindical ta den defensa di nan coleganan cu ta den e situacion relaciona cu e sucedido di tiramento Diamars atardi na Pos Abao, y den esaki ta cuestiona e funcionamento di Crisis Team.
El a splica cu e no por bisa exactamente, na ki momento e Departamento di Crisis Team a wordo lanta, pero segun e por a compronde (refiriendo na e caso di Diamars), nan ta specializa den e trabaonan aki, y supuestamente nan tin un patruya accesible, no di polis pero di mesun tipo, pa nan sali ora cu ta necesario.
“Pero, kico ta pasa ta cu cada bez cu Polis yama Crisis Team, nan ta bisa polis pa nan bay prome, check’e, laga nan sa. No. No t’asina esey ta funciona. Wak e situacion con el a bira, hopi fastioso.
Mi ta kere si tabata tin otro hende cu no tabata polis, e historia por a cambia. Pero e hendenan aki no ta haci locual nan tin cu haci. Mi ta wak, nan ta busca trabao pa haci, mi no sa si nan a drenta porta di cushina, of algo asina, pero nan no ta funciona”, Rodney Solognier a expresa.
El a subraya cu eynan gobierno mester cuminza presiona pasobra nan a wordo tuma pa haci un trabao, no pa nan modela. “Polis tin cu wanta tur sla cu ta bin tur ora, y esey nos no ta acept’e tampoco”, Solognier a señala.
E ta kere cu e ministernan concerni lo yama SPA pa un reunion, pasobra mester gara e toro na su cacho, pasobra e situacion no por keda asina. El a reitera cu, na final di dia, no ta polis su trabao pa atende cu e personanan cu problema mental.
El a referi tambe na cierto material cu ta hopi bon pa KPA tin, manera bodycam y tazer (pistol electrico) lo ta artefactonan hopi bon pa polis tin, pero semper ta haya e contesta cu no tin fondo, cu no tin placa, pa adkiri e cosnan aki.
