Rodney Solognier di SPA ta bolbe pidi Gobierno
ORANJESTAD (AAN) Rodney Solognier di Sindicato SPA di Polis, a declara na DIARIO, tocante e caso lamentable cu a sosode Diamars atardi di tiramento na Pos Abao, y cu ta, fuertemente, den dominio publico den nos comunidad, cu realmente no ta trabao di polis, atende e casonan di hende cu problema mental.
“E tipo di personanan aki, hopi di nan, of mayoria, ta hendenan cu no por yuda den e forma cu nan ta traha of ta move, y nan mester wordo atendi diferente, pa locual por a pasa Diamars.
“Nos ta pidi, den e caso aki, gobierno actual pa nan haci lo miho posibel pa e Departamento y Instancianan aki, por wordo activa mas pronto posibel, pasobra ta wordo papia rond cu nan no ta traha manera mester ta”, segun Rodney Solognier, lider di SPA.
El a señala cu e ta spera cu aworaki cu e situacion aki a sosode, cu gobierno pone man duro riba locual mester wordo haci.
“No ta un, no ta dos, pero hopi hende nos tin cu problema mental”, Presidente di SPA a indica.
Tocante e comentarionan cu ta circula den pueblo, cu polis sa tecnicanan pa den casonan cu nan tin cu defende nan mes, unda cu ta haci nan maximo esfuerzo pa no saca arma.
“Loke mi ta ripara ta cu tin hopi experto riba Facebook, anto e expertonan aki no ta yuda nos den nada. E momento cu bo ta haya bo mes den un ‘live and death situation’, tur bo estudio, tur bo capacidad, tur cos ta bay den bashi anto ta un experiencia den bida cu ningun hende lo kier pasa. E ta un ‘abo of ami’ na e momento eynan”, Solognier a expresa, agregando cu e ta kere cu e cabayeronan polis envolvi den e situacion Diamars, a pasa den un situacion hopi critico, cu e, personalmente, lo bisa cu e no ta desea pa ningun hende pasa den un situacion asina, pasobra ora bo ta pasa den dje bo ta sinti kico ta kico, y kico bo lo haci. Bo por ta hopi entrena, pero bo training ta bay gewoon perdi, pasobra bo adrenalina y bo miedo ta subi na un nivel masha halto mes.
