Siete chauffeur deteni despues di Jouvert Morning

Polis a kita rijbewijs di 4 automobilista

ORANJESTAD (AAN): Riba Diasabra marduga, tanto durante y despues di e Parada di Jouvert Morning teni marduga den cayanan di San Nicolas, Polis su unidad motorisa a tene nan control di trafico na diferente puntonan strategico rond di e isla.

   DIARIO a haya confirmacion, cu nan a controla mas cu 500 vehiculo di motor y a detene 7 chauffeur pa maneha bao di influencia di alcohol.

   Durante e control aki 4 chauffeur a perde nan rijbewijs “ingevorderd”.  Esey nifica cu e cuatro personanan aki obligatoriamente tin di presenta dilanti Huez pa trata nan caso.  Di esakinan, 2 di e automobilistanan aki mester a paga un transactie boete di 650 Florin.

   Tirando un bista atras, compara cu aña 2024, e tempo aya tabata tin 14 detencion en total durante y despues di Jouvert Morning.

   Segun Liliana Rasmijn di KPA, sigur Cuerpo Policial Aruba ta hopi contento cu e resultado y ta keda recorda un biaha mas, si bo ta bebe of ta bou influencia NO stuur. Busca Bo Amigo Responsabel pa stuur pabo. # B.A.R..

   Controlnan di unidad motorisa lo continua durante y despues di cada evenemento di carnaval.