Rescate na costa panort di un turista cu a cay di baranca

Bon mes cu olanan tabata trankil

• Bon coordinacion entre personal di emergencia di Aruba 

ORANJESTAD (AAN): Tabata Diasabra alrededor di 12:30’or di merdia, cu Central di Polis a ser poni na altura, cu tin un situacion urgente ta desaroyando na costa panort di Faro di California, y cu tin un persona a cay di superficie, y ta awor pega na un parti mas abao di baranca, cerca di oriya di lama.

   Esaki a pone cu mesora a cuminza manda unidadnan di Polis, y a notifica Centro di Alarma pa dirigi Bombero y tambe Ambulance pa e lugar.

   Na caminda pa eynan, a haya informacion cu un homber turista a haya su mes cu problema den lama di costa panort.

   E prome unidad di Polis cu a yega, a bay check y nan a bin descubri cu tin un homber berdad wanta na e barancanan.  Normalmente esaki ta sumamente peligroso, como cu olanan por bati bo curpa y ocasiona hopi mas daño.

   Olanan tabata trankil: Sinembargo e suerte grandi ta cu riba Diasabra merdia, lama banda panort di Aruba tabata basta modera.  Olanan tabata trankil te modera, pero casi no ta ni yega 2 pia di altura.  Pues por lo pronto nan a mira cu e victima no ta coriendo mucho riesgo.

   A core consulta cu Bomberonan, y nan a dicidi cu ta bay haci un operacion di rescate, y toch pa seguridad a mara dos Bombero cu cabuya pa evita cu si acaso nan cay den awa, cu nan lo drief bay leu.

   Tabata un placer pa mira con Polis y Bomberonan a uni na un forma magistral den e trabao di rescate aki.  Cada uno ta yuda e otro.  Asina e dos Bomberonan a baha y a cana yega cerca di e turista masculino cu tabata mustra di tin golpi y tambe rasca cu herida na su curpa.  Unavez cu a analisa esaki, a ripara cu e homber lo no por subi bek bay halto riba su propio forza.  A dicidi na baha un brancard cu cabuya, y aki ta unda cu e turista a bay drumi riba esey, y a strap su curpa na forma safe.

   Unavez cu esaki a keda cla, a cuminza hisa e turista via e rand di baranca bay halto, y esaki a socede sin problema.  E hecho cu lama tabata hopi keto riba Diasabra a yuda grandemente.  Despues e dos bomberonan a subi bek sin problema.

   Den Ambulance, e Paramediconan a check e curpa di e turista, a stabiliza tur cos, y a bay cu ne pa Servicio di Emergencia na Dr. Horacio Oduber Hospital pa haci examennan necesario.  Nan a mira toch di trempan caba cu e turista su situacion ta stabil.

   E operacion di rescate aki a demostra, cu ora cu Polis, Bombero, y Ambulance ta traha hunto, por mira e bunita coordinacion pa un rescate cu por tabata peligroso. Agentenan policial no a duda y a sali  yuda unidadnan di bombero mesora cu na final ta mira un resultado positivo.