- Esaki debi cu tension entre pueblo y polis tey ainda
ORANJESTAD (AAN) – Presidente di Sindicato di Polis (SPA), señor Rodney Solognier, a bisa den entrevista cu DIARIO cu, como SPA e tin cu bisa cu nan ta haya hopi tristo locual a sosode cu e caso di e tiramento di e hoben concerni.
“Nos ta polis, pero ademas di polis nos ta hende. Mi ta sinti pa ambos banda, pero aworaki unico cu nos por haci ta sinta, tene pasenshi, laga e onderzoek core su caminda, na final di e historia lo cual bin, nos tur tin cu acepta.
“Cu e ta bon of ta malo, asina e ta. Y e hendenan di Ministerio Publico ta esnan cu tin e decision final” el a señala.
Solognier ta pidi pueblo encarecidamente pa celebra carnaval trankil, pasobra e tension entre pueblo y polis ainda tey, despues di e caso di tiramento.
“Locual si, mi ta pidi encarecidamente, ta pa pueblo ta mas comprendible pa locual e situacion ta, ban disfruta un carnaval hopi amicabel, corda bon cu con cu bay ta algo cu nos tur ta den dje, nos tur ta pasa leuk. Nos sa ki isla nos tin, kico nos tin na nos Isla. Y, p’asina ey, conhuntamente, nos no trece problema pa ningun persona”, Solognier a expresa.
El a agrega cu e sa cu tur hende ta gusta expresa nan mes, tur hende tin e derecho ey den e Isla democratico unda nos ta biba. “Pero simplemente no pasa e linea di ta un menaza, pasobra e ora ey cu dolor na curazon mirando cu bo ta sinti e problema den bo persona, pero nos tambe tin un trabao di eherce, y ora nos eherc’e nan kier rabia tambe y esey no ta e idea. Expresa bo mes, nos ta scucha bo expresion, di mes na un manera pasivo, y nos ta acept’e y tum’e tambe. Pero bo pasa e linea bira menaza, e no ta bay”, Presidente di SPA, Rodney Solognier a vocifera.
