Pasonan a wordo tuma pa restructura garashi di Cuerpo Policial na Balashi

ORANJESTAD (AAN): Minister di Husticia y Asuntonan Social RoccoTjon a tene un conferencia di prensa na garashi di polis na Balashi, pa loke ta e proyecto di limpieza na e garashi.

            E mandatario a papia riba e procesonan cu a wordo encamina for di luna pasa.

“Ta trata di un problema cu pa hopi aña Cuerpo Policial di Aruba ta wordo confronta cune”.

            Desde aña 2011 tin algun procesonan cu a wordo poni riba papel y a base di e procesonan aki, tabata haci e tipo di limpiezanan aki. Sinembargo, for di Ministerio di Husticia y Asuntonan Social a logra pa yega na un structura y asina a forma un taskforce cu ta consisti di huristanan di Ministerio Publico; cual ta un socio hopi importante, pero tambe di esnan den sector priva, segun Tjon.

            E mandatario a sigui bisa cu tin un motibo pakico a pone e taskforce aki traha di tal manera.

            “Actualmente, tin dos motibo pa cual autonan por wordo aloca na garashi di polis; sea nan ta wordo poni den custodia, of nan ta wordo confisca, y a base di e dos puntonan aki e ta hopi importante pa e procesonan ta bon delinea pa evita cu pais Aruba mester para responsabel pa cierto dañonan”, segun e minister.

            El a splica cu entre otro debi na e ladronicia cu a tuma lugar na e garashi di polis na Balashi, e intencion ta pa  percura pa na un forma structural e limpieza aki tuma lugar.

            “Asina ta evita cu garashi di polis, pero tambe e diferente wardanan di polis caminda tambe tin autonan ta wordo staciona, haya nan mes atrobe den un situacion similar, pa motibo cu e ta atacha tambe e seguridad di personal”, segun Tjon, kende a indica cu actualmente tin un proceso hinca den otro, bao di  autorizacion di Ministerio Publico, caminda e autonan aki segun ley, cu ya tin un cierto temporada para na garashi, lo wordo destrui, of lo bay un findishi, y pa e motibo ey sector priva a wordo incorpora den esaki, na manera cu expertonan den daño material lo duna conseho di kico mester haci cu cada vehiculo.

            A haci palabracionnan estricto cu Daltra Antilles N.V. den e caso aki, pues tur e autonan aki lo bay Daltra y nan lo wordo destrui, pa di e forma aki pais Aruba tambe por haya su “fair share” caminda e fondonan aki lo wordo re-usa pa percura pa e seguridad entre otro na warda di Balashi pero tambe na e demas wardanan di polis.