Panico ora dos boto a dal den otro anochi na Barcadera

Uno tabatin 8 pasahero abordo

• Boto chikito a zink y un menor di edad a keda herida
• Famianan ta insisti cu e capitan responsable tabata bebi 

ORANJESTAD (AAN): Varios persona a bay pasa e fin di siman largo riba Cay pazuid di Aruba.  Diasabra anochi na momento cu un boto tabata cruzando for di canto rumbo pa e Rif, cu panico nan a mira con un otro boto mas grandi ta yegando nan direccion, y e capitan no ta haciendo caso di ningun señal cu nan a duna.

    E boto Chloë ta uno chikito color blanco cu matricula A-2324 tabata cruzando lama na Barcadera cu ocho persona abordo, di cual 2 ta menor di edad.  Tur cos tabata bayendo bon, ora cu diripiente nan a mira un boto grandi ta acercando.

   Nan a grita, zwaai flashlight, y haci otro movimento pa hala atencion di e capitan di e boto ‘Palo Biew’ cu matricula A-2655 cu ta di color cora cu blanco cu tabata acercando.  Finalmente cu mesun velocidad, ‘Palo Biew’ a bin dal fuertemente den nan.  E momentum di e impacto, a pone cu un mucha abordo di ‘Chloë’ a ricibi golpi, y nan a sinti mesora con nan boto a cuminza yena cu awa.

   Mientras tanto, ainda e boto ‘Palo Biew’ cu a keda claba riba nan, tabatin su motornan poni pa speed halto.  Ta un hende den boto ‘Chloë’ a bula den lama pa bay subi ‘Palo Biew’ pa asina e paga e motor pa evita mas daño.  E ta esun cu a logra pa e capitan di ‘Palo Biew’ paga e motor.   Aki ta unda cu e persona a bin nota cu posiblemente e capitan di Palo Biew ta bao influencia di alcohol of otro substancia.

   Panico pa boto cu ta sink: Debi cu e boto ‘Chloë’ ta mey-mey di e canal pazuid di Barcadera y el a cuminza yena cu awa, mesora un yamada a bay riba VHF Marine Radio canal 16 di emergencia, pa declara e accident yama ‘aanvaring’ na Hulandes, y cu tin hende herida.

   Centro di Operacion Maritimo (MOC) a ricibi e yamada aki, y mesora nan a saca un boto Metal Shark di Wardacosta di Caribe Hulandes pa acudi na e lugar pa duna un man.  Mientras tanto Polis cu Ambulans tambe a wordo poni na altura, y nan a acudi na Waf di Barcadera.

   Na yegada di e Metal Shark na Barcadera, e agentenan di Wardacosta a mira e boto cu a zink y algun persona riba un otro boto mara na canto di Rif.  E agentenan di Wardacosta a yuda e personanan di e boto Chloë cu a zink subi riba e Metal Shark y a hiba e personanan lesiona na waf di Barcadera, unda un Ambulans y Polis tabata warda nan.  Paramediconan a atende e menor di edad herida, y despues a bay cune rumbo pa Hospital.

   Polis Polis a subi abordo di e Metal Shark pa asina nan a acudi e ora na e boto Palo Biew cu a causa e accidente.  Polis a ordena e Capitan pa bin bek cu nan pa por bay cune for di e lugar.  Oficialmente ni Wardacosta, y tampoco Cuerpo Policial di Aruba no a duna ningun detaye si acaso e Capitan di Palo Biew a keda deteni, ni si acaso a haci un test di supla pa check nivel di alcohol den su curpa.

   Hecho si ta cu Wardacosta a logra di mara y lastra e boto Chloë te na canto di lama na Barcadera.  E boto Palo Biew a wordo mara na un pier.

   Unico cos cu Wardacosta a bisa cu “e investigacion den e caso aki lo sigui”.

   Sin duda un anochi caminda cu un accident cu lo por a causa hopi mas hende herida, a resulta toch cu tur hende a keda na bida.