Na dos ocasion e chauffeur aki a purba huy for di Polis

E tabata usa smartphone y trece trafico na peligro

ORANJESTAD (AAN): Lectornan di DIARIO a caba di lesa con Vocero Policial ta haciendo un suplica fuerte na tur automobilista, pa por fabor stop di core cu bo smartphone den bo man.  E ta atribui esaki como e motibo di con asina hopi accident ta wordo registra ultimo tempo riba e isla.

   Y mira loke a socede Diamars anochi na Palm Beach.  Un patruya di Polis di Noord banda di 8:00 pm, claramente a mira e persona tras di stuur di un Boxtruck color blanco cerca di rotonde di Palm Beach, y e tin un smartphone den su man.

   Polisnan a dune señal pa stop, y el a para net riba e caminda pariba di McDonald’s Palm Beach.  Agentenan a yega cerca pa asina atende riba su comportacion den trafico, mirando e hecho cu di tin un telefon mobil den man ora di core, e ta violando Articulo 7 inciso A di Ley di Trafico, cu ta encera un boet di 500 Florin.

   Durante cu polisnan tabata papiando cu ne, el a bin cu e excusa y bisa e agentenan cu e lo ta caminda pa un hotel pa haci instalacion di zonido pa un compania.

   Polisnan a ripara cu mientras cu nan tabata atende cu e chauffeur e lo a cuminsa actua nervioso. Dado momento e chauffeur a trata di core bay y aki ta unda nan a detene y pone sinta den e patruya.

   El a worde deteni debi cu e no por a mustra un documento legal pa cu su estadia, y tampoco permiso di trabao riba Aruba.

   Durante cu e tabata den e patruya wardando pa asina e worde hiba Warda di Polis pa ser presenta dilanti un Fiscal Auxiliar, diripiente e chauffeur a logra habri e porta di e patruya pa un biaha mas trata na core bay.

   E agentenan policial a actua rapido, gara e chauffeur y mande tera, unda a pone boei no djis na su mannan, pero tambe na su pia.  E chauffeur e ora a start un sorto di Comedy-Hour, actuando como sifuera el a bira emocional, yorando cu lagrima di crocodil, y bisando cu e ta “sorry”.

   Cu Vehiculo di Transporte el a wordo hiba Warda di Polis, unda lo bay start investigacion riba si acaso e tin permiso di estadia, permiso di trabao, y tur legalidad cu hasta e doño di trabao por haya dolor di cabes cune pa emplea hende ilegal.  Si acaso e no tin documentacion, e lo wordo pasa pa Guarda Nos Costa (GNC) pa e wordo deporta y pa hopi aña lo no por drenta Aruba bek tampoco.

  Representante di e compania di zonido a yega pa pone su mes na altura di locual a sosode cu un empleado di dje cu a wordo gara, simplemente pasobra e tabata usa un smartphone mientras e ta moviendo den trafico.