Ministro Rocco Tjon contento cu Operation Command Center na Savaneta a bira un realidad

Mas di 250 camera instala rond Aruba

ORANJESTAD (AAN): Recientemente durante un momento ameno, a inaugura oficialmente e “Operation Command Center” situa na Savaneta. Minister di Husticia y Asuntonan Social sr. Rocco Tjon, conhuntamente cu Minister President señora Evelyn Wever-Croes, Korpschef y representante di Setar a hiba palabra pa asina duna inicio na e apertura oficial di e edificio nobo pa loke ta e operation command center, cual ta bay contribui na eleva siguridad riba nos isla.

   Segun e mandatario, siguridad no ta algo cu ta bin di su mes, como pais mester inverti den departamentonan hudicial pa por garantisa siguridad. No ta trata di inverti solamente den material y infrastructura, pero mas importante ainda ta pa inverti den tecnologia y recursonan humano, pues e hende cu mester haci e trabao.

  E vision di ministerio di husticia y asuntonan social, ta pa garantisa siguridad pa pais Aruba, y e vision aki ta consisti di cuater pilar. Un vision integral cu ta conta cu aportacion di ful e veld hudicial, alavez den su ehecucion cu participacion tambe di e stakeholders hudicial.

   E prome dos pilarnan, cual ta material y infrastructura ta importante pa crea e condicionnan adecua pa e polisnan por haci nan trabao manera debe ser. Esaki ta influencia e motivacion di e personal positivamente. E ultimo encuesta bou di personal di Cuerpo Policial a indica tambe cu nan ta mas motiva cu prome.

   Sinembargo, e ultimo dos pilarnan ta loke ta haci e diferencia pa como organizacion, specificamente como Cuerpo Policial, por sigui desaroya y atende cu e demanda cu ta bin, riba nivel local pero tambe internacional. Aki ta trata di inversionnan den e pilar di tecnologia y desaroyo di e Agentenan Policial.

   E importancia di inverti den e dos pilarnan aki ta bira bisto door cu criminalidad ta keda cambia, e ta tuma otro formanan, y como pais nos departamentonan mester por adapta na e cambionan aki. Pa e motibo ey Cuerpo Policial ta den un reorganizacion, pa proyectonan manera esaki, por yuda e Cuerpo adapta y na mes momento garantisa su existencia pa futuro door di ankre den e structura di e organizacion.

  Cu e “Savaneta OCC” aki, Aruba tin e centro di mas moderno den ful nos region y esaki no solamente door di e inversionnan den material y infrastructura, pero tambe door di e hecho cu ta trata di un colaboracion entre diferente entidadnan di Cuerpo Policial mes, pero tambe entre Cuerpo Policial y otro departamentonan den e cadena hudicial.

  Den e edificio aki lo worde ubica central di polis, radar kamer, y tambe e operadornan pa loke ta trata camara surveillance. Camara surveillance a inicia na 2022 y actualmente tin mas di 250 camera instala rond di nos isla. Den area di hotel, downtown San Nicolaas, y 40 localidad strategico rond di nos isla. Banda di esaki, lo inicia cu instalacion di camaranan den downtown oranjestad.

   E relevancia di e inovacion aki ta cu e trabao di Cuerpo Policial lo bira mas eficiente y eficaz, ta bay garantisa orden publico mucho mas miho y tambe percura pa mas caso worde resolvi y mucho mas lihe. A traves di e proyecto aki por garantisa e propio siguridad di nos Agentenan Policial mucho mas miho.

   Pa Cuerpo Policial por sigui desaroya di e forma aki e mester tin un bon fundeshi, e fundeshi  aki pa Cuerpo Policial a worde basha door di polisnan cu a eherce e trabao aki hopi aña atras y aworaki ta gosa di nan pensioen, nos ta gradici cada un, pasobra sin e fundeshi aki un proyecto manera esaki tampoco lo tabata posibel.

   Por ultimo, minister Tjon a gradici tur esnan cu a haci esaki posibel, esta Setar N.V. specificamente sr. Stanley Pourrier den feliz memoria. Un persona hopi dedica, pasiona y professional. E Proyecto di camara ta uno cu ya caba for di 2022 nos ta bezig cune y Stanley tabata envolvi for di comienso.

   Palabranan di gratitud y pabien na Cuerpo Policial, Coleganan Minister cu a aloca fondo tambe pa un proyecto di e magnitud aki. Parlamento di Aruba, pa aproba e diferente presupuestonan den cual ful e Proyecto integral pa loke ta camara surveillance a worde presenta. Como tambe, na henter ministerio di husticia y asuntonan social. Proyectonan asina ta solamenta posibel danki na boso dedicacion, perseverancia y lealtad.