Mester a uza forza pa detene chauffeur coriendo roekeloos

ORANJESTAD (AAN): Diadomingo den oranan di anochi, Polis a ser informa door di un señora cu su yiu ta manehando un auto y ta coriendo malo riba e caminda di Paradera direccion Piedra Plat.

   E señora a resulta di ta mama di e chauffeur, y e tabata sigui e vehiculo y lo a guia polisnan.

   Na e cruzada di ex-Weng Kee Supermarket na Piedra Plat, el a bira bay nort y eynan polis di Santa Cruz a logra stop’e. Tabata trata di un Hyundai Getz.

   E detencion mester bisa no a bay facil debi cu el a resisti, y agentenan lamentablemente mester a uza forsa bruto pa domina e chauffeur y pone boei na su mannan.

   Van di CEA a presenta pa e transporte pa warda di polis, unda e lo mester haya un cel pa e calma/ bin bij.  No ta conoci si e homber por tabata bou di un of otro substancia.