Italiano di 36 aña a bira prome morto di trafico pa 2024

Verkeersplateau y velocidad halto posible causa

• Auto a baha caminda y ranca palo di luz y bolter
• Rastro visible di e verkeersplateau pa palo di Luz 

ORANJESTAD (AAN): Tur cos ta mustra cu chauffeur di un auto sedan Kia Rio coriendo riba Irausquin Boulevard for di Alhambra direccion Oranjestad, a dal duro den e verkeersplateau cu tin dilanti Divi Dutch Village.

   Esaki a pone e auto “bula”, y ora el a cay, e chauffeur posiblemente no por a controla su stuur mas, y esey a pone cu e auto a bay den un scual.  El a slide pa asina como 57 meter pariba di e verkeersplateau el a baha banda panort di caminda, y dal violentamente na e banda di pasahero den un palo di luz, y despues twist y bolter kedando cu su cuatro wielnan den halto.

   E palo di luz a kibra y cay net pabao di e auto.

   E prome yamada a drenta 2:44 am, y mesora Central di Polis a dirigi unidadnan di Playa rumbo pa Irausquin Boulevard pa e accident.   A pensa prome cu ta den e “birada” net pazuid di rotonde di Avenida Nelson Oduber e accident ta.  Pero e tabata como 70 meter mas pabao banda panort.

   Polis a bin haya net otro banda di Divi Dutch Village un Kia Rio color shinishi cu number A-5567 cu su cuatro wielnan den halto, y den dje tabatin un chauffeur masculino cu casi no tabata reacciona.

   Dos unidad di Ambulans a yega na e lugar di accident.  E palo di luz aki cu a wordo kibra, ta apenas 70 meter pariba di entrada pa bay Banco Central di Aruba.  Poco rato despues, un unidad di Cuerpo di Bombero tambe a yega por si acaso mester di nan yudansa.

   Mas unidad di Polis a yega pa asina a cera e caminda for di rotonde cerca di Fatum/Guardian Group, y tambe e caminda mas pabao na entrada di Divi Tamarijn All Inclusive Resort.

   Paramediconan a logra saca e homber di e vehiculo, y pero ora cu a check e persona, a bin detecta cu e no tin ningun señal vital mas.  Pues el a fayece eynan mes door di e impacto, aunke e palo di luz a dal na e porta di pasahero.

   Esaki a pone Paramediconan pidi Centro di Alarma pa manda un Docter eybao.  Polisnan na nan turno a pidi Central pa manda autoridadnan concerni pa bin na e lugar, y tambe specialista di trafico.

   Como cu tin e rastro di e wielnan for di e verkeersplateau caba, a yama team forensico di BFTO tambe pa bin eynan y yuda midi e rastro aki y saca potret.

   DIARIO a tuma nota cu Alto Comisario Ramon Arnhem na e lugar tambe ta observando.

   Centro di Alarma a logra haya Docter, cu a yega eynan, y pa 3:25 am, Dr. Texier a constata morto di e homber cu Polis a identifica como Guiseppe Papagni, naci dia 24 di Maart 1987 na Italia, pues tin 36 aña di edad.

   Shersh di Funeraria a presenta despues pa asina lanta e restonan mortal di e victima di eybao.  E palo di luz a keda benta eybao como cu e no tabata conecta mas na coriente.  Diamars merdia ainda e tabata benta eynan.

   Algun persona a cuminsa comenta cu kizas e chauffeur tabata distrai y no a ripara cu tin e verkeersplateau eybao.  Of djis debi na velocidad halto e no a haya ni chens pa ripara, aunke esun aki tin e lineanan blanco di verf zig-zag modelo Europeo cu ta dunabo indicacion cu bo tin di reduci velocidad.

   Den pasado, DIARIO a yega di raporta con e Maintenance Department di un All Inclusive Resort na Palm Beach a ofrece DOW pa nan verf full na geel e verkeersplateau cu tin dilanti nan hotel.  Pasobra ta hopi auto mes tabata dal den dje sin reduci velocidad.  Pero e peticion ey a wordo rechasa door di DOW.

   Guiseppe Papagni a bira e di prome morto di Trafico na Aruba pa aña 2024.  Na su famia y conocirnan, DIARIO y Cuerpo Policial ta extende palabranan di condolencia.