Hoben di 17 aña a perde su bida den accident riba Green Corridor

E di tres morto den trafico pa 2026

• El a bolter violentamente cu su auto
• El a fayece menos di 24 ora despues 

ORANJSTAD (AAN): Tabata riba Diamars mainta, esta 6 di Januari 2026 pa 9:15 am, cu Central di Polis a wordo notifica di un accidente pisa riba Green Corridor riba e via cu ta bayendo pariba.

   Un tiki mas pariba di Rooi Barcadera, cerca di e tereno conoci como Veld di Duracell, un auto a bolter y keda basta destrui.

   Mesora a dirigi patruyanan di Polis, y alavez a notifica Centro di Alarma pa manda Ambulance pa eynan.  A haci esey debi cu algun hende a yama pa bisa cu e chauffeur no ta reaccionando.

   Ambulance a core sali tambe pa e lugar.  Na como 125 meter pabao di Young Fellow Bar & Restaurant, patruya a bin haya un auto sedan Toyota Yaris color blauw scur cu number A-69472.  E auto tabata tur kibra rond, pero riba su cuatro wielnan.  Testigonan a splica cu e auto a perde control y bolter violentamente diferente biaha y a cay bek riba su cuatro wielnan.

   Ambulance a yega cu maximo urgencia, y Paramediconan a core bay check e persona tras di stuur den e auto.  Nan a nota cu e ta na bida, pero e chauffeur su situacion tabata grave.  Nan a duna e prome asistencia medico, y ora cu a stabiliza e victima, nan a sali cu ne mesora rumbo pa Servicio di Emergencia na Dr. Horacio Oduber Hospital.

   Mientras tanto, Polis a core yama pidi yudansa di Specialista di Trafico, y tambe a bin cu e team forensico di BFTO pa haci nan investigacion.  A yama Bureau Slachtofferhulp tambe pa bin brinda sosten na famianan.

   Na Hospital el a wordo atendi, y den situacion critico a keda hospitaliza pa observacion.  Pero lamentabelmente riba Diaranson 7 di Januari 2026, Polis a wordo informa cu pa 8:35 am e chauffeur a fayece.

   Ta trata di e hoben Ronal Heredia Heredia, naci riba 30 di April 2008 (e tin 17 aña) na Republica Dominicana, pero residencia na Aruba.

   E hoben ta un persona cu hopi amistad na Aruba, y ta siguiendo su estudio pa start un carera culinario.  Su famia a keda hopi tristo cu e sucedido.

    Ronal a bira e di tres morto di trafico cu den 2026 a cuminza ta trece famianan den tristeza y dolor profundo.  Falta 358 dia mas pa bay di e aña aki, y vocero policial Liliana Rasmijn ta haciendo un suplica na comunidad pa ban trankilo den trafico.  Ban mantene trafico sigur pa tur hende.

   Tanto DIARIO y tambe Cuerpo Policial ta manda palabra di condolencia y forza na e famia di e fayecido.