Guardacosta di Punto Fijo a logra intercepta 2 Waverunner horta for di Aruba

Un persona a keda deteni

PUNTO FIJO: Un situacion transfrontera a worde atendi cune riba Diahuebs na peninsula di Paraguana, ora cu Guardacostas Punto Fijo a detecta dos Yamaha Waverunner cu ta yegando for di panort den nan awanan teritorial.

   A resulta cu e dos Waverunnernan aki a worde horta for di un compania di Watersports cu ta ofrece e servicio di huur nan pa mey ora na Eagle Beach na Aruba.  Dos persona di habla hispano cu a haci comosifuera nan ta turista, a paga pa huur e dos Waverunnernan aki.

   Pero envez di keda cune na Eagle Beach, nan a tuma rumbo pa Playa alehando di e zona unda nan tin di keda nabega.  E compania a ripara y a manda un Speedboat pa bay nan tras.

   E Waverunnernan a yega te banda di Surfside, y di aki nan a pasa cerca di Renaissance Island, y asina a subi lama grandi bay zuid rumbo pa Venezuela.

   Na Venezuela mientras tanto, e Unidadnan di Respuesta Inmediata Marítima Barracuda (URRA) 181.1 a activa riba henter peninsula di Paraguana, y nan a focus mas riba Cabo San Roman.  Nan tambe a detecta e dos Waverunnernan aki ta bin di panort, y mesora e prepara pa nan ora nan yega mas cerca di Peninsula di Paraguana.

   Aparentemente na momento cu e dos Waverunner a ripara tambe cu Guardacostas Punto Fijo ta den e area, nan a cambia di plan.  Pues envez di subi tera na Cabo San Roman, nan a cuminza bay mas pabao tratando di huy di e oficialnan Venezolano.  Esakinan a cuminza los tiro di advertencia tambe riba e Waverunnernan.

   Pero nan no a stop, y mas bien a sigui move como 22 kilometer Zuidwest di Cabo San Roman, y finalmente na altura di e pueblo di La Macolla a mik nan Waverunner riba e beach cu tin eynan, y asina a subi riba tera cune.

   Guardacostas a yega un rato despues eynan, y prensa venezolano a raporta cu solamente 1 di e manehadornan di e Yamaha Waverunner a worde deteni.  Nan a purba bay tras di e otro persona, pero esaki a huy pasa via e pida mondi cu tin net na e area ey di Ensenada di La Macolla.

   La Macolla di municipio Falcon ta situa como 54 kilometer pazuid di Eagle Beach, y segun Zona Operativa de Defensa Integral Maritima e Insular Occidental 72, bao comando di Vicealmirante Andrés Arbeláez Duarte, nan a confisca tur dos Waverunner.

   E persona deteni ta José Gregorio Olazabal Zavala di 34 aña naci na Venezuela, procedente di Los Taques.  Den su poder a confisca 2 smartphone y tambe un paspoort.  Polisnan di Cicpc Punto Fijo tambe a start cu investigacion.   Potretnan aki ta pa cortesia di Guardacostas Punto Fijo.

   Den comunicacion cu Wardacosta di Caribe Hulandes y Cuerpo Policial di Aruba, nan lo traha riba e proceso pa debolbe e dos Waverunner na e compania na Aruba.