Grupo di bandido a comete kiebro masal den Warda di Polis na Balashi

Pa horta monton di motorcycle y scooters ---ORANJESTAD (AAN): E ta conoci como “Warda di Polis na Balashi”. 

Originalmente diseña pa seccion di Polis di Trafico ubica eynan hunto cu Garage di Polis, y un espacio grandi pa warda e.o. autonan envolvi den accident pisa cu nan tin di investiga, y tambe cualkier auto, brommer, of bicicleta cu wordo confisca for di riba caminda.

   Sinembargo e cantidad di vehiculo cu tabata wordo confisca, a bira asina hopi te cu Warda di Balashi a yena.  Casi no tin espacio mas, y pesey awor ta haciendo uso di espacio na e.o. Warda di Polis na Macuarima, y tambe Warda di Polis na Shaba pa deposita vehiculonan confisca.

   Na Warda di Polis na Balashi tin personal trahando di 8:00 am pa 4:00 pm so.  Despues di esey e lugar ta keda keto, y algun tempo tabatin personal di Cuerpo CEA ta cuida e lugar.  Despues cu a stop di pago di overtime, esey tambe a desaparece.

   Mirando e hecho cu den e Warda di Balashi tin hopi vehiculo, y principalmente Scooters, Motorcycle tipo Scrambler, etc. valioso, e ta un atraccion pa delincuentenan tambe.

   Nan lo a traha un plan y asina Diamars madruga pensando cu tur cos ta keto eybanda, nan a bay pa drenta e lugar y sali cu varios motorcycle.  E kiebro y ladronicia masal aki tabata bayendo den bon direccion y nan a logra sali cu varios motorcycle.  Pero tin hende cu toch a mira nan, y core bati alarma.

   Diamars madruga pa mas o menos 4:50 am, Central di Polis a ricibi yamada cu hendenan a kibra pa drenta Warda di Polis Balashi y bay cu un cantidad di Brommer y Scooter.

   E noticia aki a pone cu Central di Polis inmediatamente a activa tur unidad di Polis riba caya pa cuminza mobiliza pa e area. Tambe a bay over na lanta e Helicopter di Polis pa asina cuminsa cu un buskeda pa e anti-socialnan encuestion.   E momentonan ey ainda solo no a sali.

   Autoridadnan a haci un coordinacion fenomenal pa asina usa zona cu nan tin sospecho cu e ladronnan lo a move.  Cu yudanza di Helicopter, tabatin un mihor bista for di halto.

   Loke a resalta ta cu varios ciudadano cu tabata mira movimento sospechoso, tabata yama Polis pa duna tip.  Esaki tabata un gran yudanza, y ta demostra cu ciudadanonan di e isla aki tambe ta fada cu tantisimo ladronicia.

   Y el a cuminza duna su fruto!  Autoridadnan a bin logra gara un persona, y asina a sigui cu e buskeda.  A haya tambe algun motorcycle den pida mondi benta abao.  Tabata comosifuera nan ta bayendo cu e aparatonan horta aki sea pa Pos Chikito of Sabana Basora.

   Un di e detencionnan fenomenal a socede riba Green Corridor unda Polisnan na pia a logra gara un delincuente mas.  Asina a sigui recupera 8 motoryccle.  Pero a sigui cu e trabao y despues di un rato a gara un persona mas.

   Vocero Policial Liliana Rasmijn a confirma mainta cu Polis a logra detene 3 hende homber, y a recupera te cu e ora ey 10 brommer/scooters.  Pero no ta descarta e posibilidad cu e grupo di bandido aki ta mas grandi, y cu lo por tin mas motorcycle scondi algun caminda.

   Segun Rasmijn, awor Recherche tin e caso bao investigacion. No ta descarta cu lo por tin mas detencion relaciona cu e caso aki. 
   Cuerpo Policial ta haci un suplica na esnan cu a mira algo, of cu bo sa di algo, of bo a ripara cu diripiente bisiña tin un brommer raro den su poder, pa yama Tipline di Polis na 111-41.  Corda cu nan ta garantiza cu bo ta keda anonimo.