Dos hoben menor di edad a tira atraco riba turistanan

Caso insolito Diasabra anochi

• Polis a actua rapido y a detene nan
• Hobennan no sa ki daño ta comete na turismo 

ORANJESTAD (AAN): Mientras cu profesionalnan den turismo ta labora tur dia, gruponan ta brain-storm con pa aumenta e fluho di mas turista pa Aruba, y Gobierno ta sigui pomp placa den plan, promocion, y mehoramento di infrastructura, cu e meta pa haci e entrada di turismo bira aun mas solido... di otro banda bo ta mira con algun mucha cu no tin interes mas di siña y educa nan mes pa haya un carera den futuro, ta dicidi na resorta na crimen y den mesun instante ta puñala Aruba cu un golpi fuerte cu ta laga e industria di turismo sacudi innecesariamente.

    Esey tabata ora cu Diasabra anochi alrededor di 11:00 pm, yamada a drenta na Central di Polis pa raporta cu na e gasoline station na final di Caya Grandi na Playa un atraco a caba di socede.

    Mesora unidad di Polis di Playa a cuminsa mobilisa pa e lugar.  Personal di Atraco Team tambe a dirigi nan mes, y na caminda a cuminsa ta vigilante pa mira cu suhetonan por ser mira den e area.

   Ora cu Polis a yega, nan a bin topa cu un Jeep Wrangler color blanco cu number V-2325 den cual tin un famia turista.  E cabayero a core splica Polis, cu e personanan cu a yega riba nan a presenta cu capuchon riba cabes, y usando un cuchiu a cuminsa haci exigencia.  E atraco a socede den e area.

   E turistanan a spanta, y den e exigencianan aki, e atracadornan a logra bay cu diferente pertenencianan di e turistanan, incluyendo un Samsung Smartphone.  E turistanan a core yega na e gasoline station y aki a bati alarma.

   Polis a cuminsa tuma descripcion di e atracadornan, y esaki ta algo cu e turistanan a suministra cu basta bon precision.  Personal di Atraco Team a yega, y mesora a sigui atende cu e turistanan.  A core busca yudansa di Bureau Slachtofferhulp tambe pa asina sostene e turistanan riba e proceso cu ta sigui.

   Polis a raporta descripcion di e dos atracadornan, y mesora e informacion a ser pasa pa otro unidadnan.

   DIARIO a compronde cu e investigacion a bay bon, y autoridad a logra detene dos hoben menor di edad, kendenan ta sospechoso di a comete e crimen aki.

   Polis tin e delincuentenan deteni y investigacion ta sigui.  Ohala por splica e hobennan aki, y tambe nan mayornan, ta ki tipo di acto baho nan ta comete.