Departamento di Rijbewijs di Cuerpo Policial a bay den accion

Sindicato aki papiando di ‘manda mensahe cla’

• ‘Awo si ta basta. No bay laga nos yega na e punto cora’ 

ORANJESTAD (AAN): E situacion cu ta pasando na Departamento di Rijbewijs ta birando alarmante. Esaki no ta un situacion cu a cuminsa recien sino algo di hopi aña caba y cu tin conocemento cerca tur e ultimo ministernan concerni cu a sinta.

   Hemchi a bay over, y Diabierna a bay den accion.

   Señor Rodney Solognier di Sindicato SPA, a enfatisa diabierna mainta, durante cu e departamento a bay den accion y pone trabao plat, cu e situacion aki a bay di malo pa peor den e ultimo añanan.

   E edificio ta den estado deplorabel, tin sistemanan di airco cu no ta funciona cu ta causa hopi calor. Tin beskem (‘schimmel’). Blafonnan ta kibra. E problemanan aki, ta causa cu e departamento no por funciona manera mester ta. No por duna examen di rijbewijs debidamente.

   A traha varios rapport di e edificio y e problemanan cu e departamento ta enfrenta pa hopi aña caba. Hefenan di e departamento di pasado y actual no a haya contesta, segun Solognier, nan no a haya ni un si, ni un no.

   E actual Minister di Husticia, Arthur Dowers, recientemente a declara cu e departamento mester move pa otro edificio. A haya un edificio cu a a resulta cu tampoco ta adecua pa ubica e departamento aki pa funciona na e forma cu mester ta. Despues di esaki, señor Solognier a remarca, nada mas a bin dilanti mientras cu e condicion di e edificio y situacion di trabao ta empeora.

   El a enfatisa cu a yega tempo pa Gobierno di Aruba bin cu un solucion mas pronto posibel. E situacion aki, no solamente ta afecta e trahadonan, sino tambe e clientenan cu ta drenta e edificio pa servicio di rijbewijs.

   “Awe, SPA, hunto cu miembronan, ta bin aki dilanti den un accion pa pidi un solucion mas pronto posibel. No aki un aña, no un otro gobierno”, señor Solognier a expresa.

   Segun Solognier, e accion ta simplemente un yamada na e autoridadnan competente pa busca un solucion mas lihe posibel. El a enfatisa cu esaki ta e prome fase di accion pa avisa Gobierno di Aruba cu awo si a yega e punto final. Awo si ta basta. “No bay laga nos yega na e punto cora”, el a agrega.