Chauffeur di Hyundai Getz a dal den rotonde y bolter

Chauffeur lubida cu rotonde ta existi

ORANJESTAD (AAN):  Diahuebs anochi laat, algo prome cu 11:30 pm, Central di Polis a manda unidad policial rumbo pa e caminda di Kibaima pa Cunucu Abao, na altura di e rotonde di Hato cerca di sucursal di NV Elmar, debi cu auto a dal y bolter na e rotonde.

   E prome unidad di Polis cu a yega, a nota cu e Hyundai Getz a dal den rotonde, bolter, y bay finalisa na e parti mas extremo di parkinglot di NV Elmar.

   Autoridad a mira cu e Hyundai Getz color cora cu number A-70966 a keda cu masha hopi daño material.  Testigonan a indica, cu den e Getz tabatin 2 ocupante, pero despues di e accident, un di nan a core bay laga e lugar.  Chens ta grandi cu e persona ey tabata herida.

   Indicacion cu dos amigo tabata riba un trip, y mirando e daño claramente tabata move cu velocidad halto y posiblemente a lubida cu e rotonde eynan ta existi, cu a bay dal den dje y bolter.

   Banda pariba na e parkinglot di NV Elmar, na e Charging-Station pa autonan electrico, tabatin un SUV Electrico ta haciendo uso di e EV ChargeUp na e momento ey.  Aunke e Hyundai Getz a djis finalisa algun meter pazuid di dje tur kibra, e vehiculo na e Charging-Station no a ricibi ningun daño.

   Polis a cuminsa tuma dato di e persona cu a keda atras eynan cu e Hyundai Getz, pero despues di algun minuut e otro amigo a yega bek, y Polis a bay cune.  Takelwagen a wordo busca pa hisa e Hyundai Getz y a bay cune Warda di Balashi.