Chauffeur burachi coriendo banda robez a ocasiona accident serio dilanti Hotel

ORANJESTAD (AAN): Tabata Diasabra marduga cu Polis a haya informacion cu riba caminda di Avenida Nelson Oduber,

for di e rotonde di Bakval bay zuid, net pariba di Aruba Marriott Resort tin un accident frontal.

   E yamadanan a drenta poco despues di 3:00 am, y mesora Central di Polis a manda unidadnan di Noord pa e lugar.

   Na yegada tabata claro cu ta trata di un accident frontal, y cu un di e autonan a core na su banda robez di caminda.  A bin haya kibra, un auto compacto Nissan March color preto cu number A-19286, y auto compacto Kia Picanto color blanco cu number V-5123. 

   A compronde cu pa motibo inexplicabel, e Nissan March bayendo direccion zuid a hala na su banda robez y cuminza core den direccion contrario.  El a bay dal fuertemente den un Kia Picanto cu tabata bin di direccion contrario coriendo corecto na su banda.  E Kia ta pertenece na un compania di Car Rental.

   Despues cu a agentenan a nota cu no obstante e impacto fuerte, ningun hende a keda herida, a cuminza ripara cu e chauffeur di e Nissan March ta mustra caracteristicanan di ta bao influencia.  Pa comproba esaki, nan a haya su cooperacion pa haci test di supla.

   A laga e persona supla, y manera nan a pensa e resultado di µg/l di e AlcoSensor IV a demostra cu e chauffeur di e Nissan March a supla over e limite maximo cu ley ta stipula, y el a wordo deteni.  Mesora a pidi pa Vehiculo di Transporte, pa hib'e Warda di Polis na Shaba.  Mester a usa takelwagen pa kita e dos autonan, como cu e daño material ta bastante.