Chauffeur burachi a dal peaton marduga na Kudawecha

ORANJESTAD (AAN): Diasabra marduga poco despues di 1:00 am, Central di Polis a dirigi diferente unidad di Polis di Noord rumbo pa caminda di Kudawecha pa Calbas,

como cu informacion a drenta cu na altura di e Stadion di Kudawecha, auto a caba di dal un persona.

   Mesora unidadnan di Polis a mobilisa pa e lugar, y ora cu a yega na altura di e T-weg cu tin dilanti Kudawecha 75 cu ta bay pa Scol Primario Kudawecha, a bin topa cu e accident.  Nan a bin haya un peaton mal herida!  Ta trata di un cabayero di edad grandi, kende tabatin un fractura complica na su pia.  Mesora a pidi pa Ambulans yega cu mas urgencia.

   Agentenan a nota tambe cu tin un Compact SUV, Hyundai Tucson color shinishi cu number A-24176 cu impacto fuerte den windshield net na e parti di chauffeur.  Ora di bay papia cu e chauffeur di e vehiculo aki, nan a bin ripara cu e persona aki tabata bao influencia.  Ora cu a ilumina su cara cu flashlight, a nota cu su wowonan ta cora, su aliento ta hole na alcohol fuerte di uso interno, y tin lenga pisa.

   El a wordo deteni pa a viola Articulo 5 inciso 2 di Ley di Trafico, y Vehiculo di Transporte a bay eynan pa asina hibe pa Warda di Polis.

   A pidi Specialista di Trafico tambe bay na e lugar pa asina investiga e accident.  Ambulans a stabilisa e victima y despues a bay cune urgentemente pa Hospital.