Brommer na candela despues a kima cas tambe na Jucuri

ORANJESTAD (AAN): Habitantenan den area di Jucuri a sinti holo di candela riba Diasabra mainta. 

Ora cu nan a check pafo, a bin mira cu esaki tabata sali for di dilanti un di e casnan.

   Hendenan a bin nota cu un Brommer staciona den cura di cas na Jucuri 86 ta na candela.  E vlamnan tabata bay basta halto y dado momento a cuminza kima parti di e cas tambe.

   E candela aki a plama rapidamente den e parti dilanti di e cas.  Cuerpo di Bombero a yega, y mesora a saca slang pa asina cuminza combati e vlamnan.

   Polis tambe a yega, y a check cu e dama cu ta bibando eynan si tin mas hende paden, como cu e candela tabata plamando eyden.  Ora cu a realiza cu no tin mas hende paden, nan a trece e dama pafo.  Poco rato despues e propietario tambe a yega.

   Bomberonan a logra paga e candela, y e daño di candela y awa tambe tabata extenso.  Un Ambulans di ImSan tambe a yega pa asina check cu e dama si acaso e mester di oxigeno of no.

   Awor investigacion ta bay start pa check si acaso ta algo accidental a socede aki of por ta un of otro motibo cu candela a cuminza.