Auto a dal y dama sin seatbelt a wordo catapulta pafo durante boltermento

Accident serio Diadomingo merdia

• Total di tres hende herida riba Green Corridor 

ORANJESTAD (AAN): Diadomingo merdia banda di 1:00 pm, Central di Polis a cuminsa manda patruya di Santa Cruz rumbo pa Green Corridor, como cu riba e caminda di Balashi bayendo pabao, un auto a bolter y pasa over di e separador (‘berm’) mey-mey di e dos via.

   Polisnan di Santa Cruz, y demas unidadnan mesora a cuminsa mobilisa eynan, y Centro di Alarma a saca Ambulans pa bay eynan.  Ora cu nan a yega, nan a nota cu un auto a bolter, y abao benta tin un persona femenino basta grave herida.  Mesora a pidi pa mas asistencia y pa Ambulans yega cu rapidez.  A haya sa cu den e auto tabatin 3 hende, esta un dama y dos cabayero.

   Un automobilista cu a mira loke a socede, a splica cu e Toyota Yaris color blanco a caba di subi Green Corridor bek na e rotonde di Balashi.  Como 350 meter mas pabao, pa un motibo desconoci, mey-mey di e caminda e auto a dal un birada skerpi na man robez, y esaki a hiba e auto direct pa e separado (‘berm’) meymey di e dos via, y aki e auto a bay halto y cuminsa bolter.

   Den e boltermento aki, e pasahero femenino a wordo catapulta for di e bentananan habri y a cay duro riba suela.  E Yaris mes a keda bolter y bay finalisa den pida mondi chikito banda pazuid, cu tin como 25 meter leu di e edificio grandi di Cerbeseria Balashi y Tropical Bottling.

   Ora cu Ambulans  a yega, mesora nan a atende e dama cu ta esun cu a wordo saca di e auto durante boltermento.  Nan a bay cune como e prome di eynan, cu maximo urgencia direccion Hospital.  En total a uza 3 Ambulans, y tur herido a wordo hiba pa Hospital.

   Demas autoridadnan halto, incluyendo specialista di Trafico, ekipo forensico di BFTO, y hasta Fiscal mr. van der Biezen a bin tuma nota di e accident.

   E Toyota Yaris pa un of otro motibo y tambe velocidad halto a sera un brake y hala bay links, cu e resultado cu e no por a controla e vehiculo mas y bula bay otro banda. Caminda di Green Corridor a worde cera ambos banda, tanto pa bay San Nicolas y pa bay Playa.