Atracadornan a bay cu monton di mercancia di joyeria Gemstones

Nan a keda cu helm bisti y a bisa nada

ORANJESTAD (AAN): E tabata un Dialuna tiki trankil den area di HotZone na Palm Beach.  Temperatura tabata como 31º Celsius y casi no tabata mira hopi hende na pia riba caya.

   Riba Irausquin Boulevard, na e parti di tiendanan cu tin net pabao di e hotel Trip by Wyndham (ex-Brickell Bay Resort) net banda di e tienda grandi di I Love Aruba tin un joyeria yama Gemstones.

   Diripiente e trankilidad di mainta a wordo stroba, ora cu poco despues di 11:00 am un motorcycle a yega, y dos hende a baha di esaki cu helm scur riba nan cabez.  Nan a forza nan mes drentando Gemstones y aki a saca arma di candela.

   Banda di 11:10 am, e prome yamada a drenta na Central di Polis cu atraco a tuma lugar na Gemstones Jewelry.  Inmediatamente a cuminza manda unidadnan di Polis di Noord, di Strandpolitie, y Polisnan T.O.P. encarga cu proteccion di turista.  Unidadnan di Recherche den cercania tambe a mobiliza.

   Asina a sigui haya informacion cu ta dos homber a caba di comete atraco riba Gemstones, y cu nan a sali bay riba un Scooter color preto.

   E prome unidad di Polis cu a yega, a bin topa cu empleadonan ainda basta spanta cu loke a caba di socede.  Nan a informa Polis cu tur dos homber a keda cu nan helm bisti, y cu uno di nan so tabatin un arma di candela y cu esey a menaza tur hende paden.

   Polis a puntra nan ki idioma nan a papia, pero a sali na cla cu ningun di e dos hombernan ey a bisa algo.  Cu mocion di man y movimento di curpa nan tabata “duna ordo silencioso”.  Nan a bay cu hopi mercancia y prenda mes, y un fuente a hasta papia “casi pluma e negoshi” cu nan accion hincando tur cos den un tas of ta saco grandi.

   Pero si Polis a haya sa cu nan a move bay direccion pariba riba un Scooter color preto.

   Polisnan di K9, como tambe Polis Motoriza a cuminza core den tur area di Avenida Nelson Oduber, Palm Beach, Noord, Monserat, Turibana, Kamay, Bakval, y mas.  Unidad di Atraco Team a wordo notifica, y hunto cu specialistanan forensico di BFTO a mobilisa pa e joyeria.

   Un investigacion grandi a start, y mientras tanto Polis ta pidi comunidad cu si nan a mira algo e mainta ey, cu nan por yama duna tip na e Tipline di Polis na 111-41 y corda cu nan ta garantiza cu bo ta keda anonimo.

   Gemstones Jewelry ta situa otro banda di caminda di Barceló Aruba Resort.