Area di Savaneta sin coriente debi cu auto a dal palo di voltahe halto

ORANJESTAD (AAN): Diasabra mainta prome cu solo a sali, un accident a socede riba caminda di Rooi Master pa Brazil, como 60 meter pabao di SPO Scol na Brazil.

   Polis a core yega na e cas Brazil 42-B, y su dilanti a bin topa cu un Isuzu D-Max pickup color maron cla, cu a dal ranca full un palo di luz di voltahe halto.  E palo a kenter y tabata djis wordo wanta door di e vehiculo y e wayanan di voltahe halto.

   A core pidi un unidad mas di Polis pa asina cera e caya pa evita cu trafico por sigui pasa.  Pa e habitantenan cerca di e palo di luz aki, asina nan pesadiya cu a dura 6 ora largo a cuminza.  Areanan sin coriente tabata Savaneta, Noord Cura Cabay, y Brazil.

   Ningun hende a resulta herida.  Personal di NV Elmar a yega, y mesora a mira e embergadura di e trabao grandi nan dilanti, pues di desconecta un area grandi, pa asina isola e area chikito aki, pa asina kita tur waya di coriente, waya di Setar Cable Services, y kita e palo di luz.  Tin di manda busca palo di luz nobo, prepara tur componente di isolador riba dje, hisa esaki, rek wayanan, pone schoorkabel, haci tur conexion, pa na final e instalacion pasa den keuring.

   Banda di 5:53 am, Elmar a desconecta coriente pa full e area, pa asina despues di isola nan a duna e otro areanan mas leu coriente bek.  Finalmente banda di 9:30 am a logra pone palo nobo.  Poco prome cu 11:00 am, NV Elmar a pone mayoria hende bek cu coriente, y a sigui cu trabaonan pa e otro barionan tambe keda reconecta.  Tur hende na final a haya coriente bek pa 11:09 am.

   E gastonan cu e aseguro di e vehiculo aki lo paga lo bay ta bastante!  Ainda tin algun ciudadano den bario cu lo kier bay cobra e aseguro aki pa tur soño cu nan a perde e mainta aki debi na e accident.