Accidente fuerte a laga gran parti di Tanki Leendert marduga sin coriente

Elmar cu trabao grandi inespera pa varios ora largo

ORANJESTAD (AAN): Tabata Diasabra marduga alrededor di 3:40 am, cu yamadanan a drenta na Polis cu un accident basta fuerte a wordo registra riba caminda di Solito pa Tanki Leendert, net dilanti e compania Jaced Wheels cu ta na rand di rotonde.

   Polis a yega y bin topa cu e prome pida caminda di rotonde Tanki Leendert bay zuid pa Solito completamente scur, y un monton di material y desperdicio benta riba caminda.  Y full un palo di luz grandi cu voltahe halto y tambe transformer riba dje, benta abao.

   Un SUV CS35 Plus di marca Changan color blanco cu number A-54488 posiblemente tabata bin cu velocidad extremadamente halto di zuid, a baha na banda robez di caminda, ranca e palo di luz cu tin mey-mey di Acropolis Plaza y e compania Jaced Wheels na Tanki Leendert 243-B.

   E momentum a pone cu e SUV a sigui bay panort, dal borchi di propaganda, algun tubo pa proteha un cura chikito, dal den paletnan cu tin cerca di tairanan bieu, subi e pida cura di e compania, y a bay dal riba un Ford F150 pickup color cora staciona net eynan cu sticker di For Sale riba dje.  E pickup a absorba hopi di e golpi tambe, y a keda basta destrui banda di pasahero dilanti.  Si acaso e Pickup no tabatey pa para e impacto, e CS35 Plus di Changan aki lo a sigui bay mas panort.

   Testigonan a indica cu ora cu e palo di luz a kibra, cu e transformer a explota ora wayanan a topa otro y a ilumina full e area.

   Net banda di e vehiculo Changan, Polis a bin haya e chauffeur herida sinta riba e pida cura cu a resta.  Pues e mes a logra sali di e vehiculo.  Polisnan mesora a pidi pa presencia di Ambulans, y a pone NV Elmar na altura.

   E caminda di Tanki Leendert pa Solito a keda full scur, y Polis a dicidi na cera e caminda pa evita cu otro automobilistanan lo bin dal den tur waya y demas desperdicio plama riba caminda.

   Paramediconan a yega y a atende e chauffeur, y a opta pa bay cune Hospital pa tratamento medico.  Como cu Polis tin indicacion cu e chauffeur ta bao influencia, un oficial a bay Hospital tambe cune pa sigura e proceso por sigui cu husticia despues.

   Trabao grandi pa NV Elmar: E gasto di e accident aki ta enorme, principalmente e palo di luz cu transforme cu a wordo destrui.  Aki personal di Elmar mester a lanta varios trahador for di soño pa nan bay busca ekipo y bin cu material pa haci e trabao aki.

   Na prome instante a logra di transferi areanan un tiki mas leu riba otro red, despues di a caba di isola nan for di e area.  Pues pa 5:07 am, areanan mas leu a haya coriente bek.  Pero e zona net pazuid di Acropolis Plaza a keda den scuridad pa casi 8 ora largo.

   Personal di NV Elmar mester a haci e lugar limpi, bari tur isolator di glas benta abao, lanta e transformer cuidadosamente pa evita cu e azeta paden lo sigui plama.  Kita tur waya y e palo di luz.

   Asina nan a cuminza traha y ya pa 7:50 am a pone un palo nobo eynan, y asina sigui instalacion di tur bracket, tur componente di coriente.  Banda di 8:54 am a keda cla cu e parti ey.  E ora nan a cuminza e proceso di rek e wayanan di coriente na e palo.

   Sinembargo banda di 9:20 am, awacero basta pisa cu lamper y strena a cuminza basha riba Tanki Leendert y a afecta nan.  Pa 10:34 am, nan a haci un switch back riba e area cu banda di 5’or a haya coriente bek, pa asina nan wordo poni riba e red normal.

   Finalmente te 11:24 am, pues casi 8 ora e trabao a keda cla y tur hende a haya coriente bek.