Accident violento riba WVB Boulevard a cobra bida di chauffeur

Diadomingo atardi den area di Madiki Kavel

• Dal duro riba middenberm y ranca palo di luz
• Homber di 31 aña a perde su bida eybao mes 

ORANJESTAD (AAN): E tabata un sonido masha duro mes, di hero kibrando, santo plamando, y sonido con palo di luz ta bin abao.  Esaki ta loke habitantenan di Madiki Kavel a tende Diadomingo atardi poco prome cu 5:00 pm.

   A resulta cu un auto compacto Chevrolet Spark color blanco cu number A-40413 tabata riba WVB Boulevard for di Ponton bayendo pabao rumbo pa Bushiri.  Aki pa motibonan desconoci, e vehiculo a hala na su banda robez di caminda, y na forma violento a cuminsa dal den e separador di bloki y santo.   El a keda pasa ta raspa e berm aki, te cu el a bay dal fuertemente contra un palo di luz.

   El a basha e palo di luz, y a keda keto bay na su mesun via, y e biaha aki a bolter y finalisa como 42 meter mas pabao di e palo di luz cu el a ranca.

   Den e auto tabatin solamente un persona masculino tras di stuur, y debi na e impacto y boltermento, finalmente e auto a keda cu su cuatro wielnan den halto y e mes a wordo saca y a bay dal kizas fuerte cu su cabez.

   Mesora yamadanan a cuminza drenta na Central di Polis di e accident aki, y e prome yamadanan ya caba ta indica cu ta uno hopi grave.

   Trafico cu tabata baha di Ponton bayendo pabao, a stagna.  Polisnan mes a logra yega basta rapido, y mesora a dicidi pa cera e pida caminda aki for di rotonde Ponton, te na rotonde Bushiri.

   Mirando e golpi fuerte, Centro di Alarma a manda un unidad di Bombero, y tambe unidad di Ambulans pa e lugar.  First Responder tambe a acudi pa yuda den coordinacion.

   Sinembargo a bin topa cu e victima abao cu casi nada mas di señal vital.  Sanger tabata core di su nanishi y tambe di su wowo.  Paramediconan a pone mashin pa asina detecta batimento di curazon, y a ripara cu no ta hayando nada.

   E ora Paramediconan a core pidi Centro di Alarma pa yama Docter pa bay na e lugar.  Como cu tabatin hopi hende aglomerando eybanda, a dicidi na tapa e curpa.

   Mientras tanto, Polis tambe a busca Specialista di Trafico, y tambe demas autoridad halto pa yega eynan.  Team forensico di BFTO tambe a wordo poni na altura.

   Mientras tanto, algun rato despues, e Docter Forensico, esta Dr. Voskuil a constata morto di e chauffeur identifica como Jefferson Carrera Garcia, naci na Venezuela dia 20 di April 1993, pues e tin 31 aña di edad.

   Su famianan a yega eynan tambe, y pesey a core busca asistencia di Bureau Slachtofferhulp tambe.  Amigonan a relata cu Jefferson ta un persona cu ta amigo di tur hende, y e ta yuda hende cu transporte.   Cu shersh di Funeraria e restonan mortal a wordo kita di eybao.

   Personal di WVB Boulevard tambe a yega pa asina kita e palo di luz, y tambe kita tur obstaculo cu a keda benta riba caminda.  Cu Takelwagen a kita e vehiculo.  Mayoria di e destruccion di e auto tabata na e parti dilanti.  Jefferson Carrera Garcia a bira e di 8 victima fatal di trafico pa 2024.

   Na famia di e fayecido, tanto DIARIO como tambe Cuerpo Policial ta manda su mas profundo palabra di condolencia.