Accident fuerte registra riba di Dos Dia di Pasco na Savaneta

ORANJESTAD (AAN): Riba di dos dia di Pasco, ora cu normalmente casi tur hende ta contento cu tog riba Diasabra 25 di December cu tabata celebracion di Pasco,

cu practicamente tur cos a bay trankilo, ata diripiente a sosode un accidente riba caminda di Playa pa San Nicolas, na altura di Savaneta, un poco pariba di cas di ex-Gobernador Refunjol.

   Den e accident aki, un total di 2 auto, 1 pickup y 1 boto tabata envolvi. Sigur algo cu no ta socede cu frecuencia, y a percura cu Polis di San Nicolas obligatoriamente a cera e caminda principal, pa asina personal di emergencia, roadservice, y Polis mes por atende cu e situacion aki.

   Yamadanan a cuminza drenta tanto na Central di Polis, como tambe Centro di Alarma 911 di e accident pisa aki net dilanti Taishan Bar & Restaurant na Savaneta 488.  Dos unidad di Ambulans di ImSan a sali rumbo pa e lugar, como cu hendenan cu a yama a describi e impacto como ‘grandi’.

   Testigonan a bisa, cu un Ford F150 pickup color bruin cla cu number A-7639 lastrando un speedboat di 28 pia cu e nomber ‘Gifted’ cu matricula A-2461, a sali for di e caya na banda pa subi caminda principal.

   Como cu e speedboat aki ta uno basta largo, e chauffeur di e Ford F150 diripiente a haye obliga na tuma un lorada grandi.  El a haci esey net ora cu un Chevrolet Cruze color shinishi cu number A-22972 tabata bin di pariba rumbo pa Playa.  E chauffeur di e Cruze no por a haci nada mas, pasobra e pickup inespera a sali su dilanti.

   E Chevrolet Cruze a bay dal masha duro mes den parti robez di e Pickup, y esaki a pone e Ford F150 kentel y finaliza banda pazuid di caminda.  E Chevrolet Cruze mes a bay dal e ora na e parti mey-mey di e trailer di e speedboat.   E speedboat tabatin 2 Suzuki four-stroke engine di 250HP cada uno.

   Ora cu e Ford F150 a bolter, esaki a bay dal contra un Toyota Yaris blanco cu number A-64923 cu tabata staciona dilanti di Taishan Bar & Restaurant.

   E daño material na e Ford F150 y tambe na e Chevrolet Cruze tabata basta grandi.  Pero sigur e Chevrolet a keda total loss.   Ta bon mes cu e speedboat ‘Gifted’ no a bolter tambe, ya cu ta conoci cu hopi biaha na Aruba, ora cu boto ta worde lastra riba caminda, cu bo ta haya 1 of mas hende den dje.  Den e caso aki no ta excepcion y ningun di nan a resulta herida.

   Personal di Forensys tambe tabata presente pa documenta e accidente aki.