Accident fuerte na rotonde a cobra bida di Delwin Maduro di 30 aña

Dal duro riba beton di rotonde

ORANJESTAD (AAN): Hendenan cu a tende e sonido, a bisa cu nan a djis tende un solo golpi fuerte, y nada mas.  No a tende ningun lastramento di brake, ni nada.

   A resulta cu un vehiculo SUV color blanco cu ta un Nissan Murano cu number A-26297 cu a caba di subi Watty Vos Boulevard na altura di Sun Plaza Mall, tabata bayendo direccion di Bushiri ora cu el a yega y bay dal straight den e rotonde cu tin na Schotlandstraat net banda di Ling & Sons IGA Supercenter.

   Ya pa 9:15 pm, yamada a drenta na Central di Polis pa notifica cu un accident serio a socede na e rotonde aki, y cu e chauffeur no ta reaccionando.

   Inmediatamente a pone tanto unidadnan di Polis di Playa, y Ambulans na altura pa cuminza mobiliza pa e lugar.  Como cu posiblemente e chauffeur ta pega den e vehiculo, a saca un Vehiculo di Rescate tambe di Cuerpo di Bombero pa bay eynan. 

   Polis a yega y bin topa cu e Nissan Murano a dal fuertemente contra e muraya di e rotonde, y e chauffeur paden no ta dunando reaccion.  Polisnan a cera trafico parcialmente riba Watty Vos Boulevard pa asina no stroba personal di rescate.  Ora cu Paramediconan a yega, mesora a cuminza traha riba dje pa check pulso y mira si por reanime, pero esey tabata envano.  Nan a pidi Centro di Alarma pa manda busca un Docter pa bin na e lugar.

   Pa 9:45 pm, Dr. Texier cu a yega eynan a constata morto di Delwin Lindor Maduro, naci na Aruba dia 4 September 1991, pues tin 30 aña di edad.

   Personal di Bombero a bin nota cu e chauffeur no ta pega den e vehiculo, pues e por a wordo saca normal di eynan.  Cu shersh di Funeraria, e restonan mortal a wordo transporta di eynan.

   Coleganan hopi tristo: Ora cu personal di Nagico Roadservice a yega eynan, nan a bin ripara rapidamente cu e persona tras di stuur den e Nissan Murano aki ta nan colega di trabao.  Esaki a crea un tristeza enorme entre e coleganan, y hasta hefe di Nagico Aruba a yega eynan pa asina ofrece sosten.

   Trahadornan di Media na Aruba tambe a sinti tiki tristo, como cu Delwin Maduro ta un persona kende semper ta activo pa saca potret, graba video, y tuma imagennan usando drone pa eventonan deportivo, principalmente caredanan di maraton.  E tin ruman Aschwin tambe cu ta saca potret pa prensa y pa eventonan deportivo.

   Mundo Deportivo sigur a perde un gran colaborador den Delwin Maduro cu semper a contribui cu su granito di arena pa promove deporte.  E tabata semper presente na eventonan di coremento di Patrishi Sports.

   Hopi teoria di e caso: Eybao mes por a nota cu tabatin bastante teoria pa loke a socede.  E hecho cu no tabatin ningun rastro di brake prome cu e impacto, por ta indicativo cu algo a socede cu Delwin no a ripara mes cu e ta yegando e rotonde.  Eybao mes por a nota cu toch e rotonde ey di Watty Vos Boulevard y Schotlandstraat tin bon iluminacion di diferente palo di luz cu high-brightness LED luz instala.

   Kizas e tabata un momento cu Delwin a wordo distrai door di algo?  E mesun Diadomingo ey, como 17 ora prome a socede un accident riba Watty Vos Boulevard net 2.1 kilometer mas pariba na altura di e rotonde di Tanki Leendert cerca di Acero Hardware.  Eynan e chauffeur di un Nissan Teana a bisa Polis cu el a rek man pa bay gara su smartphone, y den e momento ey di coremento e no a ripara mes cu el a yega un rotonde, y a bay dal duro contra e beton di e rotonde.  Eynan e auto a haya daño material, pero e chauffeur a sali levemente herida.

  Pues kizas Delwin tabata riba smartphone e momento ey?  E teoria ey ta algo cu ningun hende no por tin contesta riba dje, como cu no tabatin ningun hende mas den e vehiculo cune.   Tin un persona cu hasta a bisa, cu kizas Delwin a pega soño of a bira malo.  Esey tambe ta algo cu ta djis un teoria, sin ningun clase di prueba.

   Tabatin hende cu a puntra si acaso e rotondenan aki ta suficiente visible of no pa chauffeurnan anochi.  Pasobra tin di corda cu e rotonde di Watty Vos Boulevard na Bushiri tambe a conoce un accident fatal unda un turista a fayece na un forma similar.

   Famia y coleganan di Delwin tabata hopi tristo na e lugar, y uno tabata consola otro.  Delwin Maduro a bira e di cuatro victima di trafico pa 2022.  Na famianan di e fayecido, y tambe colega y amigonan, DIARIO y Cuerpo Policial ta extende lo mas profundo palabra di condolencia.

    Polis di Trafico a keda encarga awor pa traha un rapport final di e accident aki.