Accident frontal fuerte a laga dama herida cu golpi na su barica

ORANJESTAD (AAN): Diabierna mainta cu urgencia Central di Polis a manda unidad di Polisnan di Playa rumbo pa e Cruzada-Y cu tin di Avenida Milio Croes y Caya Huan Pablo II (ex-Rondweg).

   E accident tabata entre un vehiculo SUV cu ta Ford Edge color cora, y un auto compacto Honda Fit color blauw cla.

   Diabierna mainta polis a bay cu urgencia unda tin e splitsing di Avenida Milio Croes cu ex Rondweg na Dakota.

   Polis a yega y a bin haya e dos vehiculonan basta kibra.  Na e Ford Edge, a nota cu e tin un sistema hopi avanza di airbag, pasobra aki tanto e airbags di stuurwiel, airbags di dashboard, fuera tambe e side-impact airbags, y for di halto e side-curtain airbags a activa pa asina proteha e ocupantenan di haya golpi.

   Pero na e Honda Fit, a nota cu ningun airbag a sali mes den e accident fuerte aki.  E stuurwiel a keda mescos, y a hasta dobla. Pasobra e persona sinta tras di stuur kizas no tin seatbelt, y a bay dal cu su curpa fuerte den e stuurwiel y/of dashboard.  Kizas e auto aki den pasado e airbag a activa caba, y nunca a reemplaza e modulo di airbag.

   Den e accident dos persona a resulta herida, di cual un di nan ta un dama a resulta herida cu golpi fuerte den barica. Por a mira esaki con e tabata keha di masha hopi dolor, wantando su barica.  Ta golpinan ora bo bay dal den stuurwiel y/of dashboard.  Polisnan a pidi ambulance pa yega lihe.

   Trafico mester a worde desvia, mirando unda e accidente a pasa autonan lo no por a pasa y alavez nan lo a stroba trabao di Paramediconan.

   Na e lugar, un di e victimanan a worde controla eynan mes, mientras e dama si mester a bay Hospitaal pa mas observacion.

   Takelwagen a ser pidi pa hala e Honda Fit un banda debi cu no por a core ariba su mesun forsa.