Hues ta hay’e culpabel
ORANJESTAD (AAN): E acusado Venezolano G. di 24 aña biba na Aruba, Diaranson mainta a scucha Hues bisa cu e ta culpabel di a abusa di e yiu di su pareha, e mucha muher E. di 15 aña. Hues no a sigui Fiscal cu a exigi 4 aña di prison. Hues a condena G. na 3 aña di prison.
Exigencia di Fiscal: Dia 5 di Maart 2025, originalmente tratamento di e caso a tuma lugar caminda Fiscal a acusa G., cu dia 6 Mei 2024, G. a viola e mucha E. Subsidiario Fiscal a acusa G. di a haci actonan inmoral cu e mucha.
Fiscal ta haya cu G. a abusa di su posicion como padrastro di e mucha. Fiscal a mustra cu ta un hecho cu muchanan cu bira victima di abuso, ta keda afecta. Fiscal a exigi 4 aña di prison pa G.
Pa loke ta e demanda di daño, Fiscal ta haya cu no tin splicacion drechi riba e demanda material y pesey el a pidi Hues pa declara esaki no admisibel. Pa loke ta e daño inmaterial, Fiscal ta haya cu e mucha E. a keda afecta. E ta haya cu por aproba 5 mil Florin pa daño inmaterial. Fiscal a bisa cu esaki ta haci cu ta keda e oportunidad pa e mama di e mucha E., por cuminsa un caso civil. Fiscal a exigi tambe, pa Hues impone medida di pago contra G.
Sentencia: Diaranson mainta por a mira cu e mama di e victima, e dama J., tabata presente den sala di Corte, pa scucha e sentencia. Hues a bisa cu e ta haya G. culpabel di a abusa di mucha E. di 15 aña cu ta yiu di G. su pareha, e dama J.
Hues a mustra cu e mucha E. a duna declaracion amplio y ta worde confirma pa su ruman homber. Ademas investigacion forensico a haya DNA di G. riba carson di e mucha E.
Hues a bisa, cu e no ta kere e defensa di abogado cu lo tabatin un set up di parti di e mama di e mucha contra G. Hues a rechaza esaki. Hues a sigui bisa cu e no ta kere declaracion di G. cu e no a haci nada.
Pa cu e castigo, Hues ta haya cu G. a tacha integridad di e mucha. Hues ta haya cu G. a abusa di e confianza cu e mucha mester tin den su padrastro.
Pa cu e demanda di daño, Hues a aproba 5 mil Florin y a declara e resto di demanda di daño no admisibel.
Hues a condena G. na 3 aña di prison, kitando e tempo cu G. ta sera caba. Tambe Hues a bisa cu e ta pone medida di pago pa G. paga e daño inmaterial.
Por a nota cu e sentencia a afecta G. Su wowonan a yena cu awa. Ora el a lanta pa sali for di sala di Corte, acompaña pa un miembro di seguridad CEA, por a mira con G. a keda mira e dama J. rabia.
