Despues di insistencia di abogadonan pa scucha testigonan cu PG a nenga
ORANJESTAD (AAN): Allan Howell (52) diamars mainta, acompaña pa abogadonan mr. Emerencia, mr. D. Croes y mr. Duijneveld, a presenta den sala di Corte di Husticia pa tratamento di apelacion contra su sentencia di dia 24 Maart 2023. Hues di Corte den Promer Instancia a condena Howell na un multa di 35 mil florin of 120 dia di prison. Tambe a condena Howell na 2 aña di prison di cual 6 luna ta condicional cu 3 aña di prueba. Ademas Hues a ordena pa 15 mil florin keda confisca.
Despues di oranan di discusion entre abogado mr. Emerencia, miembronan di Hof y Procurador General (PG), Hof a pospone e caso merdia pa sigui atardi 3’or pero pa fiha un fecha pa cuminsa cu tratamento di e caso.
ABOGADO A CUESTIONA INVESTIGACION
Procurador General (PG) a presenta e acusacionnan contra Howell cu ta: entre 2018 y 2021 a malversa 197.404 Florin di partido POR y e Stichting Hunto Nos Por.
Entre October 2019 y 2021, Howell lo a falsifica recibonan.
Segun e relato, e caso a cuminsa despues cu Financial Intense Unit (MOT) a traha raport cu tin iregularidadnan riba cuenta bancario di Stichting Hunto Nos Por. Tambe lo a mira irregularidadnan riba cuenta bancario di Howell.
Hof a mustra cu tin carta di peticion di abogadonan pa scucha testigonan. Na Februari 2025 PG a nenga e peticionnan. Hof a bisa cu e abogadonan ta insisti pa scucha e testigonan. Hof a duna mr. Emerencia e chens pa splica e peticionnan.
Mr. Emerencia a cuestiona cu nan no a haya tur documentonan di e caso. E abogado a bisa Hof cu tin e impresion cu durante tratamento di e caso den Promer Instancia, Ministerio Publico tabatin prioridad pa castiga Howell y no a percura pa tin claridad den e caso caminda mester a haci mas investigacion. E abogado a bisa cu a pidi pa scucha testigonan pero PG ta nenga. Na opinion di mr. Emerencia, e meta di scuchamento di e testigonan ta pa haya claridad riba e caso. E abogado a menciona cu director di MOT tabata presente den un reunion di Conseho di Minister pa cuestiona e caso Howell. Pesey kier scucha e director.
Na opinion di mr. Emerencia, MOT a notifica iregularidad y Ministerio Publico a ordena Landsrecherche pa haci investigacion. E abogado a señala cu tin indicacion cu ta Aruba Bank lo a notifica MOT pero ora e abogado anterior di Howell, mr. Canwood, a puntra Aruba Bank, Aruba Bank a bisa cu no a haci ningun notificacion na MOT.
E abogado a remarca cu si Aruba Bank no a haci notificacion, ta ken a notifica anto pasobra ley no ta permiti MOT pa haci investigacion riba su mesun iniciativa.
MESTER SCUCHA TESTIGONAN
Mr. Emerencia a remarca cu Howell a bira victima di un investigacion sin motibo. E abogado a pidi Hof pa laga scucha, ex min di Enseñanza, señor Lampe, kende lo a graba e reunion. Tambe e abogado a pidi pa scucha ex Minister Presidente, señora Croes, ex minister di Husticia, director di MOT., PG, y e Fiscal encarga cu e investigacion.
INFLUENCIA POLITICO DEN INVESTIGACION
E abogado a mustra cu door di e asunto aki, ex Minister Presidente a bisa cu Gobierno a cay door di e investigacion penal riba Parlamentario Howell. E abogado a bisa Hof cu e ta haya cu ta influencia politico a causa tur esaki. El a cuestiona cu mas cu 4 aña y mey despues di e denuncia, a trata e asunto di Howell den Parlamento. Na opinion di e abogado, esaki mester a sosode di biaha ora cu MOT a señala contra Howell. E abogado a pidi tambe pa scucha e ex president di Parlamento y e doño di Aruba Bank. Tambe e abogado a pidi pa scucha señora Ridderstap viuda di tata di Howell. E abogado ta haya cu e señora ningun momento a declara na Recherche cu e difunto tabata maestro di school y ningun momento tabata consehero di Howell.
E abogado a pidi Hof pa aproba e peticionnan y pa instrui Hues Comisario pa haci e interogacionnan pa despues bay over na tratamento di e caso den apelacion.
HOF TA CUESTIONA
Hof a remarca cu si for Januari 2025, e abogadonan a haya e documentonan di e caso di e abogado anterior, pakico no a haci e peticionnan mas tempran. Di con te awor den Corte Superior, caminda a stipula cu ta haci tratamento di e caso, e abogadonan ta bin cu e peticionnan aki. Hof a bisa cu mr. Emerencia ta tuma e risico cu e caso ta keda posponi y tambe por sosode cu Hof por tuma un otro decision.
Hof a remarca cu e planificacion pa cu e caso no ta bon. Na opinion di Hof, no ta importante pa scucha e hefe di Landsrecherche, tampoco Ridderstap. Hof a mustra cu durante investigacion di Recherche na e cas, Ridderstap a bisa cu su casa defunto tabata maestro di school henter bida y no consehero.
PG TA REACCIONA
PG a bisa cu el a wordo sorprendi cu un cantidad di peticionnan. Hof a pospone e caso pa un rato pa asina duna PG e tempo pa bay prepara y duna su punto di bista. Despues di e pausa, PG a reacciona cu den Corte den Promer Instancia, a entrega tur e documentonan na e abogado anterior. El a mustra cu den ley ta para bon cla cu e abogado anterior mester a duna e abogadonan e documentonan. PG a sigui bisa cu na October 2024, den “regie zitting” (caso di preparacion), e abogadonan a haci cantidad di peticion y gran parti a wordo rechaza. Na Januari 2025, e abogadonan a apela riba e nengamento di e peticionnan y a pidi pa scucha e dama F.B., cual a keda rechaza.
Na opinion di PG, cu FIU (MOT) a haci investigacion y no tin nada no normal. El a reacciona riba e señalamento cu tin metemento politico den e asunto aki. PG a bisa Hof cu nada di esaki ta berdad. PG a bisa cu no tin influencia politico den e caso. El a remarca, pakico e abogadonan kier scucha e hefe di Landsrecherche. Na opinion di PG, e peticionnan pa scucha testigonan ta mucho laat. El a bisa pa Hof rechaza esakinan.
HOWELL KIER PA SCUCHA TESTIGONAN
Howell a bisa Hof cu e ta agradecido pa por haci peticion pa scucha testigonan. El a bisa Hof cu den tur e discusion, e ta central den e caso aki. E ta haya cu e testigonan ta hopi importante p’e. Howell a bisa Hof cu e tin derecho pa pidi pa scucha e testigonan pa e por demostra na Hof riba su inocencia.
KEN TA TRAS DI E CASO
Howell a enfatisa cu no tin denuncia haci na MOT, pa haci investigacion. MOT a haci investigacion riba su mes. No tin denuncia di malversacion. Howell a bisa cu e kier sa kende ta tras di tur e cos aki.
Hof a bisa cu lo bay evalua pa dicidi. Atardi 3’or a sigui cu e caso caminda Hof a dicidi cu ta pospone tratamento di caso Howell pa fin di November 2025 mientras cu dia 25 April 2025, Hof lo laga sa si ta honra e peticionnan di abogadonan pa scucha testigonan of no.
