Maneho severo di Ministerio Publico pa cu arma di candela
ORANJESTAD (AAN): Den Corte di Husticia por a constata cu ultimo añanan, hopi hende, entre nan hoben, ta presenta dilanti Hues pa posecion di arma di candela. Ta asina cu Ministerio Publico y Huesnan di Corte di Husticia ta considera potret di arma di candela den smartphone, como posesion di arma di candela. Esey ta haci cu, depende di e situacion, e sospechoso por haya castigo di 1 aña di prizon.
Potret di arma den bo smartphone ta castigabel: Informacion cu DIARIO ta dispone di dje ta mustra cu den e mundo di gang y droga, ta manera algo normal pa miembronan ta publica riba Facebook, Instagram of otro medio, con nan tin arma den nan poder y droga. Den Corte diferente biaha Hues a mustra cu Polis a haya video of potret di e sospechoso cu arma den man.
Den Corte por a constata cu segun ley, si un sospechoso tin potret of video di arma di candela den su smartphone, esaki ta wordo considera como posecion di arma di candela. Ora di detencion di un sospechoso, Polis ta listra den smartphone di e sospechoso y hopi biaha sa sosode cu tin potret(nan) di arma(nan) di candela y of droga.
Castigo ta start cu 1 aña di prizon: Ministerio Publico ta hiba un maneho severo contra arma di candela. Arma di candela ta preocupante na Aruba. Ultimo añanan mas y mas ta haya casonan di tiramento caminda hasta asesinato a sosode. E casonan lamentabel di ultimo lunanan ta causa hopi preocupacion y insiguridad den comunidad.
Ministerio Publico ta calcula cu pa aña, mas o menos 100 sospechoso ta wordo castiga pa posecion di arma di candela. Mirando e situacion alarmante aki, Ministerio Publico a subi e castigo. Awor, e castigo ta cuminsa na 1 aña di prizon pa posesion di arma di candela.
Pa cu e potret di arma di candela den smartphone, por a compronde cu Polis ta haci investiga pa tin indicacion bon cla cu e potret di e arma a wordo saca na Aruba y tambe e fecha cu esaki a wordo saca.
Castigo ta depende di situacion: Ta asina cu Fiscal di Ministerio Publico, den Corte, ta presenta na Hues su punto di bista di e caso. Sa sosode cu Fiscal ta desvia di e maneho stipula pa Ministerio Publico. Por ehempel, Fiscal ta tene cuenta si e sospechoso ta menor di edad, si ta promer biaha cu e sospechoso ta cay den man di husticia.
Tambe por tin situacion caminda Fiscal ta exigi mucho mas castigo. Esaki pasobra tin circumstancia(nan), cu ta haci e caso hopi mas serio. Por ehempel, e tipo di arma. E ta un arma automatico, un granada of arma di candela pisa. Tambe Fiscal ta tene cuenta cu e cantidad di balanan cu a haya.
Castigo pa pistol y revolver: Ata algun detaye aki. (*) Pa tin un pistol of revolver haya na cas, e castigo ta 9 luna di prizon di cual 3 luna ta condicional cu 3 aña di tempo di prueba. (*) Pa tin un pistol of revolver na lugar publico, e castigo ta aumenta na 21 luna di prizon di cual 6 luna ta condicional cu 3 aña di tempo di prueba. (*) Si ta trata di un sospechoso cu a yega di cay sera caba pa arma di candela, e castigo ta 2 aña di prizon.
Castigo pa arma automatico: (*) Pa tin un arma automatico na cas, e castigo ta 18 luna di prizon di cual 6 luna ta condicional cu 3 aña di tempo di prueba. (*) Si ta trata di arma automatico na lugar publico, e castigo ta aumenta na 2 aña y 6 luna di prizon, di cual 6 luna ta condicional cu 3 aña di tempo di prueba.
Castigo pa granat/bom: (*) Pa tin un granat/bom na cas, e castigo ta 1 aña di prizon di cual 4 luna ta condicional cu 3 aña di tempo di prueba. (*) Si ta trata di granada/bom na lugar publico, e castigo ta aumenta na 2 aña di prizon di cual 6 luna ta condicional cu 3 aña di tempo di prueba.
Castigo pa arma pisa: (*) Pa tin arma(nan) pisa na cas, e castigo ta 3aña di prizon di cual 1 aña ta condicional cu 3 aña di tempo di prueba. (*) Si ta trata di arma pisa na lugar publico, e castigo ta aumenta na 4 aña di prizon di cual 1 aña ta condicional cu 3 aña di tempo di prueba.
