Den caso serio di maltrato di adulto mayor:
*Ministerio Publico ta investiga posibilidad pa bolbe deten’e
ORANJESTAD (AAN): Hues-comisario a suspende diaranson atardi e detencion di e homber L.S.H., sospechoso di a maltrata un persona di 79 aña di edad na un cas di cuido den anochi di 16 pa 17 di juli ultimo. Ta trata di un caso serio, den cual un adulto mayor a sufri lesionnan grave.
Hues-comisario a duna ordo pa suspension di detencion di e sospechoso H. despues cu a keda constata cu e homber aki no ta apto pa sigui deteni, o sea, ta incompatibel cu detencion.
El a wordo manda cas cu condicionnan.
Un sospechoso ta wordo considera incompatibel cu detencion ora su estado fisico of mental no ta permiti pa e keda deteni na un manera sigur y responsabel.
Den e caso aki, e sospechoso H. ta depende di cuido 24/7, cu ta algo cu no por wordo suministra ni na Warda di Polis, ni tampoco na Huis van Bewaring.
Ademas na Aruba no ta existi otro facilidadnan adecua pa detene un sospechoso den e condicion medico cu e persona aki ta den.
Den situacionnan asina, hues-comisario por dicidi pa suspende detencion y impone condicionnan.
Hues-comisario a impone cierto condicionnan riba e sospechoso en cuestion. E mester keda disponibel pa Husticia, mientras Ministerio Publico ta investiga e posibilidadnan pa bolbe deten’e.
Pa yega na un solucion ta bay tuma tempo, pasobra Aruba ta depende di Hulanda pa gana H. den un facilidad di detencion apropia, y un traslado asina no por wordo regla den corto plazo.
N’e mes momento, manera indica anteriormente, Warda di Polis no ta un lugar adecua pa detene e persona aki.
P’esey Ministerio Publico, cu hopi disgusto, a laga e sospechoso L.S.H. bay pa awor, pero lo sigui traha pa haya un lugar di detencion pe, di modo cu e por wordo deteni di nobo.
