Hues a duna orden di aresto
ORANJESTAD (AAN): Diahuebs mainta den Corte di Husticia mester a trata e caso penal contra e homber R. acusa di abuso di un mucha muher. Sinembargo e abogado mr. Illes so a presenta. Ta asina cu abogado a bisa Hues cu su cliente ta na altura di e caso pero e no sa pakico e no a presenta den Corte.
SOSPECHOSO NO A PRESENTA DEN CORTE
Fiscal a pidi Hues pa pospone e caso pa Fiscal instrui Polis pa bay busca e sospechoso na su cas. Despues di un rato a sigui cu tratamento di e caso y Fiscal a bisa Hues cu no por a haya e sospechoso. Hues a dicidi cu no ta keda otro cu ta duna orden di detencion di e homber R.
ACUSA DI ABUSA DI MUCHA
E acusacion cu tin contra e homber R. ta cu entre 11 y 12 April 2024, el a abusa di un mucha muher bao di 16 aña. Ta asina cu e sospechoso R. no ta deteni.
VICTIMA TA KEDA WORDO MENAZA
E mayornan di e victima tabata presente den sala di Corte. Hues a puntra e mama, kico e ta pensa cu mester bolbe pospone e caso. E mama a bisa Hues cu e kier tin un final di e caso. E mama a bisa Hues cu su yiu muher ta keda haya menaza di e pareha di R. E ta haya cu ta 1 aña y 6 luna a dura cu e caso ainda no a keda trata y e kier pone un fin na esaki. E mama a bisa Hues cu R. ta sigui manda mensahe pa su yiu muher.
ORDEN DI DETENCION
Hues ta haya cu ta importante pa pospone e caso. E kier pa e sospechoso R. ta presente pa asina por trata e caso. Hues a bisa cu e ta pospone e caso pa 5 September 2025 pa 1.30 di merdia. Hues a duna orden di detencion di R. pa asina ta sigur cu dia 5 September 2025, R. ta para dilanti Hues pa duna cuenta pa loke el a haci.
