Ministerio Publico cu atencion pa casonan di mordemento
ORANJESTAD (AAN): Na numeroso ocasion ora ta bira conoci cu animal a ataca un ciudadano, sea na cas of riba caminda como peaton, cu pueblo ta puntra na final di dia si acaso autoridad ta haci algo cu e doño di e animal agresivo.
E siman aki, Ministerio Publico a duna comentario riba esey, y nan a confirma cu nan ta persigui en principio tur doño di cacho despues di un incidente di mordemento, unavez Polis of otro cuerpo di investigacion traha proces-verbaal.
DIARIO a compronde cu na Aruba, ya e maneho aki ta valido desde prome di Januari 2023 y ta worde aplica independientemente, pues sea e victima ta un persona, of e victima ta un bestia (e ora su doño ta esun cu a keda perhudica).
Cu e maneho aki Ministerio Publico ta busca pa enfatisa e responsabilidad di doñonan di cacho.
Na mes momento, Ministerio Publico ta traha pa baha e cantidad di incidente di mordemento y pa fortifica seguridad di ciudadanonan y di bestianan en general.
Un comentario publica recien ta mustra cu hopi hende ta sinti cu e control den cuadro di ‘Ley di Cacho’ a manera bay perdi of den lachi di olvido. Nan ta spera cu sikiera Gobierno aki lo pone Bureau City Inspector cuminza mobiliza atrobe cu nan vehiculo ‘Dog Catcher’, como cu tin hopi cacho di caya canando rond liber y nan ta kere cu e caya ta “nan propiedad”, y ta ataca tur peaton, bicicleta, of motorcycle cu pasa riba nan caya. Hopi biaha e cachonan aki ta basta agresivo pa colmo.
E deseo ta pa e servicio di Dog Catcher start bek atrobe e aña aki mes, pa asina doñonan di cacho cuminsa siña laga nan mascota den nan cura di cas.
