Hues a baha castigo pa culpabel di accidente di trafico mortal na Savaneta

Mientras cu Fiscal a exigi 4 aña di prison

ORANJESTAD (AAN):  Hues no a sigui Fiscal su exigencia di 4 aña di prison pa e homber Eugene E.E. Lacle di 24 aña, kende ta wordo haya culpabel cu riba algun luna pasa, esta 18 di Maart 2024 e ta responsabel pa ocasiona un accident grave net dilanti Home Fun Super riba caminda principal na Savaneta, unda el a dal den un Motorcycle cu ta bin for di direccion contrario..

   Hues ta haya cu no a keda legalmente proba cu Lacle a core iresponsabel y pesey a baha e castigo.

   Fiscal a exigi 4 aña: Luna pasa, 1 November 2024, Hues di Corte den Promer Instancia a trata e caso caminda Fiscal a bisa cu segun ley, e castigo maximo cu por duna pa core iresponsabel y causa accidente fatal ta 6 aña di prison.

   Fiscal a mustra cu Lacle tabata core sin rijbewijs, e tabata core mas duro cu borchi ta mustra, e tabata core bao influencia di alcohol. Fiscal a sigui bisa cu Lacle tabata core un Nissan March right hand steering y a bay pasa un truck mientras un motorcycle tabata bin den direccion contrario.

   Core iresponsabel: Fiscal ta haya cu esakinan ta motibonan di peso cu por haci e castigo subi mas. Na opinion di Fiscal, tur esaki ta mustra cu Lacle a core iresponsabel y door di su culpa a causa morto di Hernandez Pinedo.

   Pa cu e castigo, Fiscal a bisa cu e ta tene cuenta cu ta promer biaha cu Lacle ta cay den man di husticia. Fiscal a exigi 4 aña di prison y cu Lacle no por core auto pa 5 aña. E demanda di e mama di e victima pa daño, 17.557 florin, Fiscal ta haya cu por aproba. El a pidi pa declara e otro demandanan di daño no admisibel y cu por bay Corte Civil.  Fiscal a bisa cu e ta kere sin duda cu tin daño inmaterial, daño psiquico pero ley ta exigi cu mester hustifica e demanda cu raport di psicologo.

   Fiscal a pidi pa declara e demanda inmaterial no admisibel. Pa loke ta e pareha di e victima, e dama T. cu e demanda paga pa proceso cu a cana pa e tata keda reconoci como tata di yiu y otro gastonan, Fiscal a bisa cu mester declara nan no admisibel. Na opinion di Fiscal, no por trata e asunto di alimentacion di yiu te cu 18 aña. Esey mester bay caso civil.

   Sentencia: Via video conference Hues a dicta sentencia. Hues tabata den sala di Corte di Husticia, hunto cu Fiscal, abogado y famianan di e victima. E acusado Lacle tabata den un oficina na KIA. Hues a bay hopi detaya den su sentencia.

   El a bisa cu ta legalmente proba cu Lacle no tin rijbewijs y dia 18 Maart 2024, e tabata core un Nissan March y na Savaneta a bay pasa un truck su dilanti. Door di esey, el a bay dal frontal den motorcycle cu consecuencia cu Hernandez Pinedo a fayece.

   No a core iresponsabel: Hues a bisa cu Fiscal ta haya cu Lacle tabata core cu velocidad halto, un forma di pusta. Fiscal ta haya cu Lacle tabata core iresponsabel. Hues ta haya cu segun ley ta castigabel ora causa accidente mortal. E pregunta ta si ta culpa di Lacle.

   Hues ta haya cu Lacle a core bao influencia di alcohol y core demasiado duro. Investigacion a mustra cu Lacle tabata core 115 km y a pasa e truck. Sinembargo Hues ta haya cu no por saca afor cu Lacle lo tabata pusta. Na opinion di Hues, no tin suficiente prueba cu Lacle tabata core iresponsabel.

   Baha castigo hopi: Hues a bisa cu door di Lacle su culpa y no intencional, a causa e accidente mortal. Pa cu e castigo, Hues a bisa cu e ta tene cuenta cu e seriedad di e hecho y cu Lacle a mustra duele cu loke a pasa. Hues a bisa cu pa resto di Lacle su bida e lo keda afecta pasobra Lacle conoce e victima. Hues a bisa cu door cu no prueba cu Lacle a core iresponsabel no por confirma e exigencia di Fiscal

   Hues a condena Lacle na castigo 12 luna di prison, di cual 3 luna ta condicional cu 2 aña di prueba. Hues a bisa cu esey ta nifica cu e luna aki mes, December 2024, Lacle lo sali liber. Hues a sigui cu pa 2 aña, Lacle ta prohibi pa core auto. Hues a aproba 10 mil florin di daño y a stipula medida di pago. Tambe Hues a aproba 3.000 Florin pa e pareha T. di e victima cu medida di pago. Esey ta nifica cu si Lacle no paga, e lo mester bay sera den KIA.

   Hopi demanda di daño no por wordo honra: Pa loke ta demandanan di daño, Hues a bisa cu e ta aproba pa e mama di e victima, 17.000 Florin y resto di e demandanan no ta keda declara no admisibel y lo por haci un caso civil. Esun di e pareha T., Hues a aproba 3 mil florin y resto no admisibel.

   Hues a bisa cu no tin ningun duda cu tin hopi dolor y tristeza pa e morto tragico di e victima, pero segun ley, e daño psicologico y afecto no por wordo paga. E pareha T., Hues a rechaza e demanda di gastonan den futuro y e parti psicologico y afecto.

   Pa loke ta demanda di e dama T. pa gastonan di entiero, ta wordo honra. Hues a aproba algo mas di 10 mil florin. Pa loke ta e demanda di e dama T. cu ta algo mas di 80 mil florin, Hues a rechaza gran parti di demanda pasobra den caso penal no por determina alimentacion di e yiu. Hues a bisa cu T. por haci un caso civil.