Cuater aña di prison exigi pa trio Bulgaro cu tabata skim carchi di banco den ATM mashin

Fiscal a bisa cu mester manda señal bon cla cu Aruba no kier skimming

ORANJESTAD (AAN): Diabierna mainta un trio di Bulgaria a presenta dilanti Hues pa e caso di skimming di carchi di banco. Ademas di e tres Bulgaro tabatin un Dominicano biba na Aruba, J.B., kende tambe ta wordo acusa di ta forma parti di e grupo.

            Na final di tratamento di e caso, Hues a pospone e caso un rato y a bolbe y dicta sentencia di biaha pa J.B. Hues a comparti punto di bista di abogado mr. Kuster y a declara J.B. liber. Den un otro articulo, DIARIO lo publica di esaki. Pa e Bulgaronan, Fiscal a exigi 4 aña di prison. Den e articulo aki DIARIO ta concentra riba tratamento di e caso y exigencia di Fiscal. Den otro articulonan ta publica e defensa di abogadonan.

ACUSACION

E hombernan G.N.S., A.G.B., M.D.D. ta wordo acusa cu entre Augustus 2021 y 23 September 2021, nan a skim un cantidad di carchi di banco y a participa den un organizacion criminal di falsificacion.

TRADUCTOR VIA VIDEO CONFERENCE

Door cu e tres Bulgaronan no ta papia otro idioma, Corte di Husticia a busca asistencia di un traductor na Hulanda. Un dama, via video conference tabata haci traduccion pa e Bulgaronan di tur loke tabata wordo bisa. E traductor tabata traduci tambe tur loke e Bulgaronan tabata bisa na Hulandes.

SKIMMING DI CARCHI DI BANCO

Ta asina cu A.G.B. a admiti di a haci skimming. Hues tabata kier sa su funcion. El a splica cu su funcion tabata pone e camera cu ta haci e skimming den ATM mashin y despues kit’e. E resto di trabao tabata pa M.D.D.

Segun A.G.B. na Bulgaria el a planea esaki cu M.D.D. Segun A.G.B. na 2017 e tabata na Aruba. Awor ta promer biaha cu e ta haci skimming y pesey e cos a bay asina malo. A.G.B. y M.D.D. a cumpra e aparatonan via internet Alibaba y a bin Aruba. M.D.D. a admiti di ta envolvi. El a splica cu su funcion den esaki tabata instala un aparato den e ATM mashin pa ora hende hinca carchi, e copia informacion di e carchi. Hues a mustra cu M.D.D. ta specialisa pasobra el a burla e seguridad di ATM mashin.

Hues a bisa cu segun CMB Bank, e bancomatico tin un sistema special pa evita cu por hinca aparato pa skim. M.D.D. a splica cu e aparato ta parce manera un carchi y ta drenta den e parti unda mester hinca carchi.

Segun M.D.D. a purba e aparato na Bulgaria caba. Hues a puntra con a bin cu e idea pa bin Aruba pasobra e viahe di Bulgaria pa Aruba no ta barata. Nan a bisa cu nan a djis pensa pa bin Aruba.

Segun G.N.S., e conoce A.G.B. y a bis’e cu e kier pasa vacacion na Aruba. A.G.B. y M.D.D. ya tabata na Aruba. G.N.S. a bin Aruba pa vacacion y a puntra A.G.B. pa keda cerca dje. Ora el a yega el a mira cu A.G.B. y M.D.D. tabatin aparatonan di skimming y el a bira curioso. 

EXIGENCIA FISCAL

Fiscal a bisa cu na Europa skimming ta hopi conoci, caminda hendenan ta bay otro paisnan pa haci esaki y horta placa for di ATM mashin. El a bisa cu e ta haya legalmente proba cu a haci skimming riba bancomaticonan di CMB. Ariba camera di seguridad Polis a mira e trio ta haci cosnan. E copiamento di carchinan y despues traha esakinan ta wordo considera falsificacion di carchinan.

APARATO PA SKIM Y CARCHINAN HAYA

Fiscal a bisa cu na e cas unda e tres Bulgaronan a keda a haya aparatonan cu ta usa pa skimming y traha carchinan falso. Tin indicacion cu nan a copia carchinan na ATM mashin pero no a traha carchinan falso.

ORGANIZACION CRIMINAL

   Fiscal ta haya cu e grupo aki ta forma parti di un organizacion criminal. E ta haya cu tabatin un cooperacion largo entre nan pa haci e delito. E ta haya cu e trio tabata sa kico nan tabata haci. For di Europa nan tabatin e plan pa bin Aruba pa skimming. Tur esaki ta mustra cu nan forma parti di un organizacion criminal. Fiscal a bisa cu e no ta kere e storia di e Bulgaronan cu nan a bin Aruba pa vacacion y aki a bin cu e idea pa skimming. Nan a bin cu e aparatonan for di Bulgaria.

EXIGI 4 AÑA DI PRISON

   Fiscal a bisa cu Aruba ta depende hopi di turista y mas tanto turista Americano. Turistanan ta scoge Aruba no solamente pa su beachnan sino tambe pa e seguridad. Si skimming drenta na Aruba, esaki lo perhudica e isla su turismo y tambe banconan. Fiscal a tuma e grupo na malo.    El a mustra cu meymey di e epidemia cu tabata un sla duro pa Aruba, nan a scoge net Aruba pa bin haci skimming. Nan a viaha for di practicamente otro banda di mundo pa bin Aruba pa haci delito.

   Fiscal ta haya cu mester duna imagen cu Aruba ta safe y no ta permiti skimming. El a expresa cu lo tuma tur medida pa mantene esnan cu ta skimming for di Aruba. Fiscal a mustra riba e actitud di esnan di Bulgaria ora di interogacion caminda nan kier sa kico tin pa nan si nan coopera cu e investigacion. Fiscal ta haya cu ta esencial den e caso aki pa manda un señal bon cla cu no ta tolera skimming na Aruba. Na opinion di Fiscal, e hecho cu e skimming a fracasa lo no bay haci cu e castigo lo ta menos. El a enfatisa cu e trio Bulgaro a bin Aruba cu e intension pa haci skimming.

   Fiscal a exigi 4 aña di prison pa e grupo Bulgaro. Tambe el a exigi pa tur e aparatonan lo keda confisca.

   Hues, despues di a scucha e defensa di abogadonan mr. Maldonado y mr. Kuster, a sera tratamento di e caso y a bisa cu 14 April lo tin sentencia pa e trio Bulgaro. E sospechoso J.B. a wordo declara liber di e acusacionnan.