Abogado ta manda Hues carta pa mustra cu ta Ministerio Publico a faya

Despues di discusion den Corte

ORANJESTAD (AAN): Diahuebs ultimo, 25 Mei 2023, durante tratamento di un serie di casonan penal contra un sospechoso homber adicto P., a surgi un discusion entre abogado mr. Yarzagaray y Hues. Esaki a causa cu despues di e caso, e abogado a dicidi di manda un carta pa e Hues, mustrando cu door di fayo di parti di Ministerio Publico, a bin un discusion entre e abogado y Hues.

   Documento cu no a manda: Durante tratamento di e caso, e abogado mr. Yarzagaray, despues cu e otro abogadonan a presenta nan defensa, a mustra cu e caso a yega di worde trata caba pro forma y cu e no a ricibi e documento di citacion nobo di Fiscal.

   Fiscal den su reaccion ta mustra cu parce cu mr. Yarzagaray no a wak su documentonan bon pasobra Fiscal a manda e documento di citacion nobo. Hues a bisa cu el a haya e documento.

   Discusion: Aki ta caminda cos a manera bruha. mr. Yarzagaray no a haya su chens di reaccion y Hues a sera tratamento di e caso y a cuminsa dicta sentencia. E abogado, a lanta man y lanta para y a bisa Hues cu loke Fiscal a bisa tocante e citacion nobo no corecto. Esaki a bira un discusion entre Hues y e abogado, caminda Hues a hala atencion di e abogado cu e ta bisando sentencia y cu e abogado no por papia mas. Hues tambe a bisa e abogado cu si e no ta di acuerdo, e por apela.

   Manda carta: E abogado no a keda contento cu e procedimento aki. Por a compronde cu e abogado a manda e Hues un carta pa mustr’e riba e forma di actua di Ministerio Publico, caminda Fiscal ta usa un tactica cu na ultimo ora ta core manda documento via fax y cu Corte a ricibi pero abogado no a haya nada.

   E abogado no kier señala cu ta intencionalmente Ministerio Publico ta haci esaki pero cu hecho ta cu e no a ricibi e documento.

   E abogado a haci un apelacion na Hues pa den tipo di casonan asina, pa promer cu tratamento di e caso, check si di berdad e documento di citacion nobo a worde manda pa asina coregi tur eventual fayo di parti di Ministerio Publico.