Den estado di bancarota Aruba a enfrenta e enemigo Covid-19 --- *En preparacion pa Thanksgiving ta duna prueba di ingratitud --- *Na final di 2017 medida tabata “conditio sine qua non” pa sigui
ORANJESTAD(AAN)—Na 2020 Aruba como pais financieramente y economicamente destrui, a presenta cifranan conoci oficialmente como presupuesto, cu mester a habri un caminda nobo pa e pais.
Un caminda nobo cu a bira necesario, despues cu e pais mester a acepta atrobe exigencia Hulandes pa motibo cu Aruba mester a pidi Hulanda asistencia y ayudo y asina entrega su autonomia pa cual tanto el a lucha.
Cu cifranan nobo den su man, Aruba dirigi pa Gobierno Wever-Croes, a presenta na Reino e formula financiero pa bay paga debe y mas debe a base di e debe nacional pero tambe e e aventura di Citgo, cu a costa placa y a laga Aruba rehen economico na 2017.
Pa motibo di Citgo, ni instancianan oficial na Aruba, por a presenta cifranan pa futuro y e presupuesto cu a keda atras di Gobierno Mike Eman pa 2017, a bira hilaridad di Reino.
Ta cu presion di Reino y e realidad cu e exigencianan di Reino tabata “conditio sine qua non” pa Aruba sobrevivi, Gobierno Wever-Croes mester a hiba Aruba normalidad.
E palabra “normalidad” ta nifica, cu hende ta biba cu loke nan tin. Cu hende no ta biba den nubia, pasobra hende a wordo crea pa cana cu dos pia riba planeta tera y uza su inteligencia pero tambe aplica buena fe.
Citgo na 2017 kier a uza Aruba como asilo politico despues cu Husticia Mericano a cuminsa persigui e gang cu a firma e acuerdo pa bin habri e restonan mortal di Lago cu placa di Maduro, loke a pone henter mundo hari.
Na 2020, ora Gobierno Wever-Croes a logra cifranan nobo pa e porvenir di Aruba, Covid-19 a ataca pa sembra dolor, morto, destruccion di hende y tur loke hende mester pa ta feliz.
Den un situacion di angustia mundial, Gabinete Wever-Croes mester a percura pa Aruba sigui cana.
Hulanda, conoci como pais cu ta uza su cabez den asuntonan di placa, mes a confronta problema serio pero mester a yuda Aruba den un situacion di horor.
Raymond Knops a admiti cu Evelyn Wever-Croes a cambia rumbo financiero di Aruba, cu tabata bancarota pero a impone medidanan como “conditio sine qua non” pa Aruba subi un futuro responsabel y asina haci bon uso di e placa cu den situacion serio, Hulanda a entrega.
Planificacion responsabel di Gobierno Wever-Croes a haci cu Aruba sin economia, sin entrada, a sigui cana y a duna placa pa no solamente trahadornan di Gobierno pero tambe di Comercio, por a cubri nan costo di bida.
Honestidad y berdad ta exigi pa admiti, cu e fe di Aruba den su Creador, a scapa Aruba di horor.
Cu Aruba lo mester a adapta su mes na normal, na loke e tin pa por sigui dilanti, ta un hecho cu ningun hende por desmenti.
E hecho mas importante ta keda cu Aruba a sobrevivi te awe cu e mester adapta, pero tambe mester dobla rudia pa gradici.
Awe den un mundo cu tanto nubia scur, Aruba ta bolbe enfrenta Thanksgiving. Pero Aruba no por yama Cielo danki pa e fabornan cu Aruba a ricibi, pasobra tin grupo cu no kier acepta, cu Aruba no tin e placa pa bolbe na mundo di fantasia.
Awe en preparacion pa Thanksgiving, tin grupo cu kier “turkey” y mas “turkey” y ta lubida cu Aruba tin tur motibo pa hinca rudia y yama danki cu hasta cu porta economico cera y cartera bashi, Aruba a keda cu pan riba mesa.
Welga general ta wordo planea pa e pais mientras atrobe nubianan scur di e pandemia, ta presenta na horizonte.
Welga general cu tabata mas na su lugar, ora placa pa pobernan come, a wordo usa pa tram y fietspad.
Ora analisa e berdad di e momentonan aki, un conclusion ta bini dilanti.
Arubianismo ta wordo maltrata. Arubianismo ta sufri den man di un mentalidad anti Arubano, un mentalidad importa pa mente diferente cu no conoce gratitud ni e balor di Thanksgiving pero solamente kier mira “mas turkey”.
