Sindicalistanan na haltura di nan menasa pa turismo y inversion --- *Temporada di turismo 2021-2022 cu margen halto di inseguridad --- *Intrankilidad laboral lo ta veneno pa economia fragil di Aruba
ORANJESTAD(AAN)—“Uno di e basenan mas importante pa a midi e posibilidadnan cu turismo ta ofrece na economia na 2021 ta, e hecho cu Aruba a logra baha e indice di Covid-19 na e pais. “
Punto cu a wordo trece dilanti dor di informantenan, cu a bati alarma grandi pa e menasa sindical pa accion laboral den e dianan venidero den caso cu Gobierno di Aruba no honra exigencia di sindicatonan di Gobierno.
E anuncio cu sindicatonan ta prepara pa un reunion awe den horanan di atardi, tabata tin un impacto pisa cerca un grupo grandi na Aruba.
Sector empresarial ta sumamente preocupa pa loke por pasa pero tambe gruponan grandi di trahadornan den comercio y hasta empleado publico, cu no ta di acuerdo cu e desaroyonan sindical actual.
“Accion sindical lo destrui recuperacion di Aruba cu por scapa e impacto di tanto Covid-19 como e inflacion mundial a base di prijsnan di petroleo cu ta un problema serio,” informantenan a indica.
Na prome lugar nan a mustra cu pa 2021 Aruba a pensa cu e reduccion den cantidad di casonan di Covid-19 lo a resulta den inicio di un normal nobo.
E planificacion di Aruba pa turismo tabata basa riba planificacion mundial, cu no a tene na consideracion e ola nobo cu ta causa lockdown di paisnan grandi.
“Temor pa biaha den tempo di e pandemia, lockdown di paisnan cu mester representa e mercado di turismo di Aruba y medidanan cu Aruba mester a tuma a afecta resultadonan di turismo na Aruba,” informantenan a mustra.
E miedo pa wordo contagia cu Covid-19 durante vacacion a baha sigur cerca e grupo grandi cu a vacuna y a cuminsa biaha atrobe y asint a alimenta turismo na tur parti di mundo.
Esaki a haci cu cifranan di turismo mundialmente a subi y tabata ofrece un bista alentador pa e ramo economico di Aruba.
Mundo a conoce otro problema serio cu aumento di prijs di petroleo cu a haci transportacion mas caro pa e turista. Cu otro palabra, e turista mester di mas placa pa e biaha y gosa di su vacacion cu aumento mundial di prijs.
Sinembargo, semper tin un grupo di turista cu fondo suficiente pa biaha, pues Aruba por hasta sobrevivi e impacto di aumento di prijs di petroleo ofreciendo turismo di calidad pero na prome lugar loke turistanan ta busca na Aruba, cu ta trankilidad.
E hecho cu den e situacion actual sindicalistanan no solamente ta papia di accion pero e lider sindical ta mustra cu nan intencion ta hustamente pa afecta Gobierno y asina Aruba, ta haci cu Pueblo di Aruba ta wordo menasa pa accion sindical cu por afecta pan di tur trahador na Aruba.
“E menasa di Covid-19 ta presente pa henter mundo. Aruba completo mester evita lockdown. Prijsnan ta subi pa henter mundo. Aruba mester mira con e ta competi mundialmente. Pero si den e situacion aki, e turista wordo confronta cu intrankilidad laboral, Aruba ta den un problema serio,” a wordo indica na DIARIO.
Informantenan a indica tambe cu na e momentonan aki Aruba mester atrae inversionistanan pa su recuperacion.
“Pa empresanan priva sobrevivi y asina percura pa Gobierno tin placa pa paga su trahadornan, mester di inversionista cu ta trece proyecto, Agitacion sindical ta uno di e situacionnan cu ta cera porta pa inversionista,” informantenan a splica.
A wordo indica cu ningun hende ta bay hinca nan placa na un pais, caminda como inversionista nan mes por haya nan den problema.
“E problema laboral cu tin actualmente na Aruba ta un asunto cu ta presente rond mundo ya cu Covid-19 a afecta comercio mundial y fondonan di paisnan,” a wordo mustra.
Awe Aruba ta habri cu un menasa nobo riba su cabez. Un menasa cu no ta solamente un arma contra e Gobierno, pero cu ta mishi directamente cu turismo y cu e futuro economico di e pais.
“Nos futuro ta na peliger awe,” un informante a bisa, confirmando e temor grandi cu ta biba na Aruba na e momentonan aki.
