Xixon Spanish Restaurant a habri su portanan na Paseo Herencia

ORANJESTAD (AAN)- Xixon ta un restaurant spaño situa na Miami cu mas di 20 aña di experiencia ofreciendo e miho platonan di Spaña incluyendo variedadnan grandi di tapas y biña.

Nan menu extenso ta consisti di surtido di keshi cu ham pa comparti den grupo complimenta cu seleccion grandi di biñanan y tambe por scohe entre 35 diferente tapas cayente y frieu cu sabornan exquisito.

            Pa personanan cu gusta purba algo diferente, por pidi e specialidad di e Chef ‘Pata de Pulpo con Espuma de Patatata a la Gallega’ - pia di e pulpo cu galician foam di batata. Otro specialidad di Xixon ta nan Paellas cu por escohe entre diferente opcion.

            Por disfruta di nan carninan riba grill di piedra volcanico cushina cu Flake Salt y esnan cu gusta cuminda di lama lo encanta nan bacalao, pisca cushina den biña blanco of nan salmon cu verdura. Tin variedad di cuminda incluyendo pa esnan vegetariano y esnan buscando platonan gluten-free.

            Xixon tin e combinacion perfecto pa un y tur y ta continua di sobresali den nan calidad di cuminda y servicio. Nan a wordo nombra “Best Spanish Restaurant by Miami NewTimes” na 2012 y 2018. E ta un honor pa Paseo Herencia di por tin Xixon como parti di su opcionnan di restaurant.   

            Ademas di e bon cuminda, Xixon tambe ta ofrece un ambiente familiar cu por sinta parti paden of pafo riba e teraza mirando Paseo Herencia su water show. Restaurant ta situa banda di ALDO. Xixon ta habri tur dia di 5or di atardi pa 10or di anochi.