Women’s Club of Aruba cu dedicacion na Proyecto di 'Dress a Child'

WCA a logra bisti mas of menos 270 mucha

ORANJESTAD (AAN):  E proyecto di 'Dress a Child' ta e proyecto di mas importante y ta alabes e “Signature Project” di Women’s Club of Aruba (WCA). E ta un proyecto dedica cu hopi amor na nos muchanan. Na 1997 WCA a cuminsa originalmente cu e bunita proyecto aki y e meta ta pa bisti muchanan di menos recurso pa temporada di Pasco y fin di aña.

            Pa varios siman, e miembronan di e comision a traha duro compilando e lista di e muchanan di edad 0-10 aña, cu ta bin na remarca pa e proyecto aki. Pa cu esaki, e comision a haya cooperacion di varios scol basico, asistencia social, fundacion- y of organisacionnan cu ta na haltura di e situacion di e muchanan aki.

            Asina, e aña aki un biaha mas, e capitannan hunto cu boluntarionan di club y e personal di departamento di mucha di e tiendanan concerni a dedica e siman di 6 pa11 di december pa yuda nos muchanan tur atardi.

            WCA kier a gradici directiva di e tiendanan cu a coopera  y tambe gradicimento ta bay na tur cu di un forma of otro a duna nan cooperacion y apoyo na realisacion di e bunita proyecto aki. Di e forma aki, WCA a logra bisti mas of menos 270 mucha. "Nos satisfacion ta e alegria y felicidad riba e cara di nos muchanan".

            Directiva hunto cu miembrecia di WCA kier a haci uzo di e oportunidad aki pa desea pueblo di Aruba en general feliz dianan di fiesta y un Prospero Aña 2022!