Warda di polis nobo pa Strand Politie ta compromiso pa sigui inverti  den e cadena hudicial  

Rocco Tjon:

 ORANJESTAD (AAN): Recientemente a tuma lugar groundbreaking pa un warda di polis nobo pa Strand Politie y durante un conferencia di prensa minister demisionario di Husticia Rocco Tjon a bisa cu for di hopi tempo caba a wordo indica cu e maneho ta basa riba prevencion y inverti den mihor condicionnan di trabao pa tur esnan cu ta traha den husticia.

“Nos ta papia di proyectonan infrastructural, inverti den e desaroyo profesional di nos polisnan y alavez adkiri e materialnan cu nan tin mester pa brinda un bon servicio y garantiza seguridad”.

A resulta cu e maneho a yuda pone cu crimen di alto impacto ta bahando y esaki ta wordo confirma pa cifranan di Cuerpo Policial y tambe di Ministerio Publico, segun Tjon.

El a indica cu esaki a wordo confirma tambe pa un investigacion independiente di The Telegraph, cu a conclui cu Aruba ta e pais mas sigur den e region di Caribe.

Segun Tjon, ATA a indica cu 98% di nos turistanan ta scoge Aruba pa bay vakantie, pasobra nan ta sinti nan mes sigur riba nos isla.

“Awe para akinan ta e compromiso pa sigui inverti den e cadena hudicial, pero alavez keda crea condicionnan di trabao mas mihor pa Cuerpo Policial”, segun e mandatario demisionario di Husticia.