ORANJESTAD (AAN)—E dianan aki ta plamando un virus, cu solamente ta duna dolor hopi pisa di garganta, y basta contagioso meymey di muchanan na scol of cu ta hunga hunto den nan vecindario, pero tambe na pia di trabao.
E virus, aparentemente, no ta duna keintura ni ningun otro sintoma, asina ta cu muy posiblemente tin nada di haber cu Covid-19 of su variante.
Unico remedi cu docternan ta prescribi ta paracetamol pa mucha y pa adulto segun e caso. Tambe tuma awa cu lamunchi preferiblemente frieu, pa fresca garganta y consumi asina vitamina-C.
No ta usual pa haya un virus cu ta presenta solamente un sintoma, pero ta prudente e muchanan no expone hopi na e cambionan di calor pa frio, por ehemplo si nan ta hunga na scol den pause, purba no haci weganan cu ta laga nan soda hopi di mas pa despues bay den klas cu airco.
Y lo ta bon si e muchanan por cumpra y bisti nan jacket pa airco cu ta parti opcional di nan uniform, den diferente scol, pa asina tambe mantene tibio nan curpa durante les y no sinti hopi fuerte e impacto ora nan bay pafo, sea cu e dia ta yubioso y cu biento frio, of un rato hopi calor y diripiente awacero y frio. Specialmente, tin proteha e parti di garganta. Tin indicacion e molester aki por dura entre tres dia pa un siman, segun un mayor cu a tuma contacto cu mesa di redaccion di DIARIO, y cu su yiu a haya e virus, y tambe un miembro adulto den e famia, y e ta comparti informacion di locual docter a bisa nan.
