Rolando Maduro di VRA ta splica:
ORANJESTAD (AAN): Prijs ta bay subi den diferente rijschool. Esaki ta loke Vereniging Rijscholen Aruba (VRA) a anuncia diamars.
Relaciona cu esaki y otro temanan, Tomas Ruiz, Secretario di VRA a duna di conoce cu e organisacion tambe ta preocupa cu e independisacion di Examen Rijbewijs.
El a bisa cu nan a tuma nota den medionan di comunicacion cu tabata tin un reunion virtual di Central Bureau Rijbewijs di Hulanda y nan ta lamenta un falta di transparencia akinan.
Segun Rolando Maduro, Presidente di VRA, den pasado, tabata tin hopi tardansa pa haya fecha pa examen di rijbewijs. El a bisa cu VRA no tey pa critica, pero pa bin cu solucionnan practico y structura.
Nan a propone y a insisti pa bin cu un forma digital di examen caminda cu ta clasifica 10 hende y e tempo ey tabata tin un tardansa di 10 luna pa haya un fecha pa pasa examen. Esey a wordo reduci y ta bayendo bon, a bisa.
Tin mas problemanan cu a keda cu no a wordo soluciona y un di esakinan ta e servicio cual no ta optimal. A bisa cu e forma con Examen Rijbewijs a wordo haci den pasado no por continua mas. Ta den temponan moderno y haci uzo di tecnologia, pesey a bin e digitalisacion.
El a agrega cu pasamento di examen di rijbewijs no ta un trabao di polis. Tin raportnan cu ta bisa esaki, a remarca. E mester bay otro departamento.
Si ta wak den Reino Hulandes, Aruba ta e unico pais cu ainda ta Polis ta pasa examen di rijbewijs. E trabao principal di un polis ta mantencion di orden publico y seguridad. Pasamento di rijbewijs mester bay na un otro forma, Maduro a recalca.
VRA a propone esaki na Minister Rocco Tjon aña pasa y el a priminti cu ta bay independisa pasamento di Examen Rijbewijs. Pa esaki a institui un decreto ministerial pa lanta un comision pa aconseha den ki forma e independisacion mester bay, a splica.
Pero aña a habri y un reunion a wordo yama pa e comision y no tur esnan concerni a presenta.Tempo a pasa y minister a laga sa cu e tin bon contact cu Central Bureau Rijbewijs Hulanda y cu kisas e por haya ayudo di nan.
VRA no tin problema cu esey pero nan ta kere cu na Aruba tin expertonan local cu por bin cu consehonan na minister riba ki direccion e tin cu bay.
Den e comision tabata tin tres experto cu ta traha hopi aña den Cuerpo Policial cu tin amplio experiencia y cu por guia e independisacion di e departamento aki.
El a lamenta cu na caminda a mira cu minister Tjon a tuma otro direccion y diripiente e contacto a kibra entre VRA y e comision. Minister a sigui su caminda cu CBR di Hulanda y dia 15 di Juli, VRA a ripara den medionan di comunicacion cu e mandatario tabata tin un encuentro virtual cu CBR di Hulanda.
Mesora VRA a traha un carta y mande pa e minister pa sa kico ta e desaroyo tocante e indenpendisacion di BER, pero ta mirando cu no ta hayando ningun 'feedback' di parti di e mandatario, a remarca.
Net siman pasa, e minister a anuncia cu el a institui un comision cu e tarea pa den tres luna aconseh'e den ki forma e departamento mester wordo independisa. VRA ta haya esaki straño pasobra ya caba na November e mes a institui un comision cu e mesun fin.
VRA kier sa den ki direccion Minister Tjon ta bay cu e asunto aki door di a nombra un otro comision, Maduro a expresa.
