Varios baki di sushi ta cla na Harbour Arena pa pueblo haci nos isla limpi

Gobierno y Aruba Ports Authority ta uni forsa pa hunto nos Cuida Aruba

ORANJESTAD (AAN): Durante Dia Nacional pa Cuida Aruba, Aruba Ports Authority (APA) lo pone ocho baki na Harbour Arena, Waf di Playa, pa habitantenan di Playa y barionan den cercania por entrega nan sushi.

E punto di coleccion lo ta habri riba diasabra 25 di juli 2026, di 7:00 A.M. pa 1:00 P.M.

Na e tereno lo tin espacio indica pa entrega:

• Sushi di mata y hardin
• Sushi grandi
• Carton
• Metal
• Tire
• Restonan di construccion

Pa drenta terreno di APA, e automobilistanan mester uza e entrada marca “IN”, na banda drechi riba e mapa, pues e banda di e cura di Waf na banda di ex-Bushiri Hotel. Despues, sigui e ruta geel y e indicacionnan riba tereno pa deposita cada tipo di sushi den su luga asigna.

Ora bo caba, sigui e ruta pa sali na e punto marca “OUT”, na banda robes cerca di e rotonde. Personal lo ta presente na entrada y salida pa guia trafico y yuda bishitantenan.

Wak e mapa bon prome cu bo sali, tira bo sushi y sigui e ruta indica na Harbour Arena. Hunto nos ta Cuida Aruba!

Gobierno, APA y comunidad ta uni forsa pa gran accion di limpiesa

Gobierno di Aruba, Aruba Ports Authority (APA), empresanan, organisacionnan y voluntarionan ta uni forsa pa un gran accion di limpiesa na 26 sitio rond Aruba. Na cada ubicacion lo tin baki disponibel pa comunidad deposita desperdicio.

Un di e sitionan principal ta Harbor Arena, cerca di rotonda na Wendy’s Boulevard. APA a pone e tereno disponibel y a patrocina dies baki. E sitio lo ta habri di 7’or di mainta te 1’or di merdia y lo funciona manera un drive-through.

Durante un bishita na e sitio, Prome Minister Mike Eman a gradici CEO di APA, Marc Figaroa, y su team pa nan cooperacion. El a invita comunidad pa limpia nan cura, bario, camindanan dilanti di cas y areanan publico.

“Ban cuida nos Aruba y tene nos isla limpi,” Figaroa a declara.

Ademas di Harbor Arena, lo tin baki na 25 otro sitio rond isla. SETAR a patrocina 32 baki na ocho ubicacion, mientras cu Post Aruba a distribui flyer na mas cu 35.000 cas. CMO ta coordina e 26 sitionan, cu sosten di Cruz Cora y otro instancia.

Mabon lo haya atencion special. Un organisacion di contratistanan a adopta e area y lo mobilisa mas cu 100 persona pa limpia e bario, facilidadnan deportivo y un cancha di futbol cu pa mas cu ocho aña no ta debidamente accesibel debi na acumulacion di sushi.

Gobierno ta pidi participantenan pa separa nan desperdicio na cas, usa proteccion adecuado y sigui instruccionnan di e personal presente. E meta no ta solamente pa limpia Aruba durante un dia, sino tambe pa crea mas conciencia tocante nos responsabilidad colectivo di cuida isla.

E mapanan, ubicacionnan y instruccionnan pa entrega desperdicio lo ta disponibel riba e plataformanan oficial di Gobierno y den medionan local. Pa mas informacion, bishita www.arubatanostur.com. Si tin pregunta durante e actividad, por yama +297 588-0100.