UNHCR cu donacion di siete AEDs na CMO Aruba

ORANJESTAD (AAN): Den cuadro di Dia Mundial di Seguridad y Salud na trabou, UNCHR a haci donacion  di  7  AEDs na CMO Aruba.

            Algun di e AED’s lo  wordo pone den  edificio den cual CMO ta ubica ya cu tin 4 otro departamento di Gobierno cu gran cantidad di empleado, y e AED’s lo sigura un ambiente di seguridad na trabou pa tur personal.

             E otro AEDs lo ser ubica strategicamente den e CMO Mobile Medical Unit cu ta ser uza den evento y actividad nan grandi y durante emergencia. Tambe lo inclui algun AEDs den e vehiculonan di emergencia di CMO cu ta disponibel 24 hora. Tur personal cu ta uza a ekiponan menciona a haya e training necesario.

            “Garantisa  acceso na servicionan di salud ta esencial  pa tur residente di Aruba, ta di suma importancia pa UNHCR”,  sra. Irene van Rij,  Head of National Office pa Aruba y Corsow, a enfatisa.” E AEDnan lo ta beneficioso p’e comunidad local y tambe p’e migrantenan y refugiadonan na Aruba”.

            Ya pa algun aña caba ta existi un bon relacion di colaboracion entre  UNHCR  y CMO Aruba.  UNHCR a haci donacion di 58  units  (RHU)  cu a keda uza pa reforsa  e infrastructura necesario durante  pandemia y nan ta sigui wordo uza durante varios otro evento y actividad tambe.  

            Durante pandemia,  UNHCR a haci donacion adicional di varios producto y ekipo di proteccion esencial.

              “E meta principal di CMO ta pa garantisa seguridad y bienestar de henter e comunidad, specialmente den tempo di crisis. Durante e ultimo añanan, e apoyo, cooperacion y  colaboracion di parti di UNHCR tabata fundamental y masha aprecia. Nos ta contento y agradecido cu e donacion generoso aki”, sr.  Eurico (Rino) Hermans, Director di CMO a indica.

            E colaboracion entre  CMO y UNHCR ta resalta e importancia di ta prepara pa crisis y  emergencianan, pa asina garantisa un futuro mas saludable y sigur para Aruba y su  residentenan.

            Presente n’e entrega di donacion - UNHCR : Sra. Irene van Rij, Head National Office Aruba & Curacao y  Sra. Maya Soumah, Associate Protection Officer. Di parti di CMO Sr. Rino Hermans, Director Sr. Rene Ridderstaat y Sra. Yvonne Geerman-Quant y Sra. Gina Lopez-Gnecco, Ketenmanager.