ORANJESTAD (AAN): Diamars mainta Corte di Husticia a trata e caso sumario cu e empleado H. a cuminsa contra WEB Aruba NV.
E caso ta relaciona cu e medida cu Gobierno a introduci di 12.6% pa tur empleado di Gobierno.
Manera ta conoci, sindicatonan a tene accion di algun ora pa demostra nan mal contento cu e medida aki. E sindicatonan a menaza di tene accion y Gobierno a avisa cu si tene accion e consecuencia ta pa e sindicato mes.
Ayera mainta e empleado H. a dicidi di cuminsa un caso sumario contra WEB pa no kita e 12.6% di su salario. E caso aki por worde mira como un caso di prueba. Si e empleado gana su caso, por spera cu sindicatonan lo bay cuminsa caso pa haya e mesun cos.
Desde e pandemia di Covid-19, Gobierno a anuncia cu a haya ayudo financiero di Hulanda y a introduci “FASE” y e subsidio financiero pa companianan y negoshinan. Gobierno a haci esaki pa yuda tur esnan cu a perde trabao, pa nan tin un entrada. A anuncia tambe cu lo yega e momento cu e financiamento lo caba y lo mester bay paga back.
Awor cu Gobierno a introduci e 12.6%, sindicatonan a rabia y a expresa cu nan a entrega basta caba y no ta mira pakico mester sigui kita placa for di nan salario.
E caso di ayera ta importante pa mira kico lo bay pasa awor. Tratamento di e caso a tuma algun ora y Hues a bisa cu e ta bay studia e ponencia di e abogadonan.
A keda palabra cu dia 22 di Januari 2022 lo tin sentencia.
