E forsa financiero di AZV ta uno di e preguntanan cu ta presenta --- *Normalisacion di comunidad ta depende grado di responsabilidad --- *Hende ainda no a derota e Coronavirus cu tin hende como rehen
ORANJESTAD (AAN) — Ministro Dangui Oduber tin tur rason ora e bisa cu comunidad mester sigui cana y mester drenta e periodo di normalisacion despues di Covid-19.
E sonido aki ta wordo scucha rond mundo mientras paisnan ta trata di adapta nan mes na un normal nobo, cu ta depende completamente di hende y responsabilidad di hende.
E dependencia di e virus riba e grado di responsabilidad di hende ta directamente visibel den e hecho cu e virus ta depende di hende pa e existi. Sin hende e virus tambe ta disparce.
E Coronavirus nobo ta depende di e cooperacion di tur hende pa e sigui plama y ta depende di hende pa e sigui desaroya.
Esaki ta haci cu hende ta directamente enemigo of amigo di hende den su comportacion, loke sigur ta bini dilanti den e motibo pa cada ola nobo di infeccion cu a afecta tanto hende cu a biba pa loco como hende cu a trata na tur forma pa cuida nan salud.
Tur instancia mundial a duna hende sosten pa enfrenta e virus, cu na Maart lo mester enfrenta un vacuna nobo cu por subi mercado y ta specialment dirigo riba e variante Omicron.
E hecho cu hende ainda no a derota e virus a bini dilanti na pais cu mester a anuncia cu nan ta drenta un normal nobo, cu ta completamente diferente for di loke un bida normal di hende mester ta.
Pa deshaci di e virus mester di vacuna y remedi pero tambe mester di hende pa comprende cu no necesariamente e mester stima otro hende, pa e trata di evita mas infeccion.
Mas y mas ciencia ta cuminsa papia di e forma cu e virus por afecta hende den futuro y e resultadonan cu e por tin pa muchanan cu ta wordo infecta y por carga esaki resto di nan bida.
Tur pais na mundo mester prepara nan mes pa resultadonan cu Covid-19 por tin riba salud di hende infecta.
Den nan curpa di hende e virus a sconde y ta den curpa di hende el a crea resultadonan cu ainda no ta visibel.
Kico esaki lo haci cu futuro? Cuanto placa Cuido Medico lo sigui costa no solamente pa vacuna pero tambe pa cuido di e ser humano?
Na varios pais ya a cuminsa papia di e fase nobo y endemico di e Coronavirus nobo. Esaki ta nifica cu ta acepta e malesa como un enfermedad cu por bira conoce un brote manera otro enfermedadnan.
Pero e virus lo bira mas fuerte? Mientras mundo kier prepara pa un normal, tin mas variante na caminda?
E grado di imunidad den comunidad, no a wordo alcansa na hopi pais y a keda demostra cu hende por bira victima di diferente variante.
E pregunta mas grandi ningun hende por contesta. Kico e resultado final lo ta di Covid-19 pa salud di esnan cu a wordo infecta?
Por surgi un variante nobo cu ta mas peligroso cu Omicron?
Hende no por keda para keto. Pero e sentido di responsabilidad di cada persona lo dicidi riba tanto aspecto directamente mara na e calidad di bida, cu Siglo 20 a pone na un nivel haltisimo y cu Covid-19 a destrui!
Ta na hende pa considera Covid-19 enemigo y ta na gobernantenan pa guia hende na un normal nobo, cu sigur no ta wordo alcansa si nos no kier uza tapaboca, si nos no kier practica distancia social y si nos kier biba pa loco y soña cu nos a derota un virus, cu tin nos economia y bienestar te awe como su rehen.
Esey ta e unico siguransa cu Covid-19 a entrega hende!
